Европа
ЕП бара од членките на ЕУ да му обезбедат заштита на Сноуден
Европските пратеници во четвртокот со мнозинство гласови усвоија резолуција со која се бараат поголеми гаранции за заштита на личните податоци на Европејците, и со која побараа од земјите членки на Европската унија да му понудат заштита од прогонот на поранешниот информатичар и соработник на американските разузнавачки служби Едвард Сноуден, кој повеќе од две години живе во Русија со привремен азил во неможност да отпатува во некоја од латиноамериканските земји, поради американската и блокадата од нивните европски сојузници.
Пратениците ги повикаа земјите членки на ЕУ „да се откажат од секаков прогон на Едвард Сноуден, да му обезбедат заштита и, со тоа, да ја спречат неговата екстрадиција или враќање во трети земји, како признание за неговиот статус на предупредувач (ткн ‘свиркач’) на опасноста и меѓународен поборник за заштита на човековите права“, толкувал за руската агенција РИА неименуван портпарол на Европскиот парламент во Стразбур.
Оваа точка од резолуцијата којашто се однесува на Сноуден, е прифатена со просто мнозинство, 285 гласови „за“, 281 гласови „против“ и 72 европратеници биле воздржани, преку амандманот кој го предложиле пратеничките левите и радикалната левица (GUE), потсетува AFP.
Едвард Сноуден на Twitter оцени дека гласањето е „извонредно“, додавајќи дека тоа е „раката којашто му ја пружиле пријателите“.
Резолуцијата којашто не е обврзувачка, туку е политичка порака, во целост ја изгласале 342 пратеници, против биле 274, а 29 биле воздржани.
Во неа пратениците изразуваат задоволство од неодамнешната одлука на Судот на правдата на ЕУ кој ја поништи правната рамка, ткн „Safe Harbor“‘, за преносот на личните податоци меѓу ЕУ и САД во комерцијални цели, во аферата во којашто е вмешана и најголемата светска социјална мрежа Facebook. Пратениците ја повикаа Европската комисија до крајот на 2015 година да подготви извештај за ефектите од таа одлука.
Европскиот парламент, притоа, изразува „загриженост поради неодамна донесените закони во поедини земји членки во коишто се зголемуваат можностите за надзор од страна на разузнавачките тела“, алудирајќи на Франција, Велика Британија и Холандија./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Во Киев се урива споменик кој ја слави блискоста меѓу Русија и Украина
Властите на Киев во вторникот почнаа да го отстрануваат споменикот од советската ера што ја означува врската меѓу Русија и Украина, повеќе од две години откако Москва започна инвазија врз Украина.
Неколку дена ќе бидат потребни за целосно уривање на споменикот од црвен гранит, кој се состои од дваесетина поединечни елементи, соопшти градската управа.
Тоа е всушност група статуи кои прикажуваат украински Козаци кои го опкружуваат лидерот Богдан Хмелницки и московскиот амбасадор.
Статуите ќе бидат префрлени во воздухопловниот музеј.
Споменикот е изграден во 1982 година за да го одбележи „обединувањето на украинскиот народ со братскиот руски народ“ во 1654 година, кога Хмелницки склучил сојуз со рускиот император во борбата против полско-литванскиот сојуз.
Советските историски книги го романтизираа како почеток на нераскинливо пријателство меѓу Украина и Русија.
Европа
Белоруските спортисти одат на Олимписките игри, Лукашенко: Победете ги противниците
Белорускиот претседател Александар Лукашенко денеска им порача на белоруските спортисти кои учествуваат на Олимписките игри во Париз под неутрален статус „да ги победат своите противници“.
„Ако сте избрале и одите таму под неутрален статус, истепајте ги, покажете им дека сте вистински Белоруси“, рече Лукашенко во соопштението за печатот на претседателството.
За време на посетата на регионот Могилев во Белорусија, жителите го прашале Александар Лукашенко што мисли за ова учество под неутрален статус, се вели во извештајот објавен на веб-страницата на белоруското претседателство.
„Спортистот треба да избере. Доколку одлучи да учествува на Олимписките игри, ќе биде уште пожесток. Затоа што разбирате дека состојбата на умот и гневот не се од мала важност во спортот“, реагира Лукашенко. „Вие сте Белорусија и кога ќе излезете како победници, тоа е добар начин политички да ги удрите во лице“.
Лукашенко, кој е на власт од 1994 година, ги искорени сите форми на опозиција во неговата земја, потиснувајќи мирно масовно движење во 2020 година. Тој е навикнат и на широки изјави и испади, како на пример кога парадираше со калашников во раката пред демонстрантите кои се противат на неговото владеење, нарекувајќи ги „стаорци“. Во февруари 2022 година, тој ја отвори Белорусија за руската армија за да може да ја нападне Украина од север.
Белорусија беше исклучена како земја од Игрите поради нејзината поддршка за руската инвазија на Украина, а нејзините спортисти се натпреваруваат под неутрален статус, без химна, знаме или национални обележја.
Европа
(Видео) Полицијата го бркаше убиецот со меч низ Лондон, објавена е снимка
Би-би-си објави снимка на која се гледа лондонската полиција која го брка напаѓачот со нож, кој денеска уби 13-годишно момче и повреди неколку други.
На снимката се слушаат полицајците како им викаат на граѓаните: „Заклучете ги вратите“.
Полицијата смета дека не се работи за терористички напад.
Полицајците уапсија маж вооружен со меч по извештаите за сериозен инцидент со прободување во североисточен Лондон.
Со електрошокер бил совладан 36-годишниот маж кој мавтал со меч.
„Со голема тага можам да потврдам дека 13-годишното момче кое беше избодено, почина во болница набргу откако му биле нанесени убодите“, изјави началникот на лондонската полиција Стјуарт Бел.
Уште две лица и двајца полицајци се во болница поради убодни рани и се надвор од животна опасност.
„Не мислиме дека постои закана за пошироката заедница, полицијата не бара други осомничени и се чини дека овој инцидент не е поврзан со тероризам“, рече Бел.