Претседавачот со американскиот сенатски одбор за вооружени сили, сенаторот Џон Мекејн по средбата со српскиот премиер Александар Вучиќ изјавил дека Србија има голема поддршка и на европскиот пат, како и во поглед на инвестициите од американските компании, пренесува Танјуг.

По разговорите со Вучиќ, Мекејн оценил дека двајцата имале одлична средба со напомена дека високо го цени српскиот премиер и дека со нетрпение ја очекува својата посета на Белград, без да прецизира датум за кога би можел да ја посети земјата.

 Американскиот сенатор додал дека Србија може да смета на силна поддршка од САД и дека иако Вашингтон не и диктира на ЕУ што да прави, на Србија може да и помогне во дипломатска, економска и секоја друга смисла.

Српскиот премиер Вучиќ изразил благодарност до Мекејн поради поддршката и помошта од САД, истакнувајќи дека српскиот народ тоа го цени и дека се надева оти сенаторот наскоро ќе му биде гостин во Србија.

Вучиќ во четврток ја завршува посетата на САД за време на која оствари низа средби со американски претставници со кои разговарал за билатералните односи, економската соработка и поддршката на Вашингтон за европскиот пат на Србија. Српскиот премиер во четврток ќе се сретне и со американскиот помошник државен секретар за Европа и Евроазија, Викторија Нуланд, како и со еврокомесарот за соседска политика и пристапни преговори Јоханес Хан, кој во моментот престојува во Вашингтон./крај/мф/бс