Европа
Завршени заложничките кризи, Оланд потврди четири цивилни жртви
Во речиси истовремените операции на специјалните сили на француската полиција во петокот, беа завршени двете заложнички кризи во кои убиени се тројца напаѓачи и најмалку четворица заложници, потврди вечерта францускиот претседател Франсоа Оланд во специјалното обраќање до нацијата.
„Земањето заложници во Париз, во кошер супермаркетот, доведе до смртта на четири лица“, изјави францускиот претседател Франсоа Оланд и додаде дека „тоа е антисметиски чин“.
Претходно полициски извори за француските медиуми соопштија дека на местото на киднапирањето во продавницата за еврејски прехранбени продукти во 20-от арондисман на француската престолнина Париз се пронајдени пет тела, меѓу кои и на терористот.
„Франција мора да биде способна да одговори на секоја терористичка акција“, истакна Оланд. Притоа ги поздрави ангажманите на француските контингенти во странство во борбата против екстремистите. „Фанатиците немаат ништо заедничко со муслиманската религија“, заклучи претседателот на Петтата Република.
Оланд, исто така, ги повика Французите да земат масовно учество на националниот марш во неделата. „Јас ќе бидам таму“, рече.
Во петокот малку по 17 часот по локално време прво се слушнале детонации а потоа и истрели во индустриската зона кај гратчето Демартен-ан-Голе, кога полицијата упадна во печатницата во која држеа заложник и во којашто се сокриваа двајцата браќа, француски државјани од алжирско потекло Саид и Шариф Каши, кои се осомничени дека во средата го извршија нападот врз редакцијата на сатиричниот неделник Charlie Hebdo поради објавувањето на карикатури со пророкот Мухамед во кој беа убиени десет новинари и двајца полицајци. Браќата излегле од печатницата од којашто претходни беше изнесен неповредениот заложник, и запукале врз полицајците, по што биле застрелани.
Градоначалникот на местото Демартен-ан-Гоел, Мишел Дутруж напиша на интернет страницата на градот „Нападот е завршен. Заложникот е ослободен. Готово е! Им благодарам на сите, блиските и далечните, кои помогнавте овој страшен ден добро да заврши“.
Речиси истовремено полициските специјалци го нападнаа и кошер супермаркетот во источниот дел на Париз, во кој еден вооружен напаѓач држеше група заложници. Грабнувачот, 32-годишниот Ахмед Колибали беше баран поради убиството на полицајката во четвртокот во квартот Монруж. Заедно со него беше барана и неговата девојка 26-годишната Ајат Бумедиен. К
Според исказите на полициски извори и очевидци, Кулибали барал од жандармеријата да ја прекине операцијата за апсење на браќата Каши за да можат да го напуштат градот Демартен-ан-Гоел, и да бидат пуштени на слобода и се закани дека доколку жандармеријата не го послуша ќе ги убие заложниците. Кулибали беше убиен во акцијата, во продавницата загинаа четворица заложници, а најмалку еден полицаец е ранет.
Полицијата браќата Каши ги бараше поради тоа што во седата, според очевидци, со повиците „Алаху акбар“ (Господ е голем) и „Го осветивме Пророкот“, ја нападнаа редакцијата на Charlie Hebdo.
Во петокот еден од челниците на џихадистичката организација Исламска држава објави дека оваа сунитска радикална група ја презема одговорноста за нападот во Париз. „Ние ја покренавме француската операција и ја преземаме одговорноста за неа. Утре сме во Велика Британија, Америка и на други места. Тоа е порака за сите земји кои учествуваат во коалицијата која под американско водство ги убива припадниците на Исламската држава“, додаде Абу Саад ал-Ансари во пораката од ирачкиот град Мосул каде џихадистите кон крајот на јуни 2014-та прогласија исламски калифат.
Францускиот министер за внатрешни работи Бернар Казанев изјави во петокот по завршувањето на двете заложнички драми дека „од длабочината на срцето“ им се заблагодари на француските безбедносни сили коишто, како што рече, дејствувале со многу „самоконтрола, вештина и храброст“. Во тридневните операции учествувале околу 90.000 припадници на безбедносните сили и служби. Според Казанев, неопходно е да се „задржи будноста“ и по овие акции. „Мораме да останеме извонредно будни и обединети, а јас и натаму ќе бидам концентриран на својата задача, безбедноста на Французите“, рече Казанев во телевизиското обраќање.
Претседателот на Европскиот совет, Доналд Туск, објави дека во недела ќе учествува во големата поворка во Париз. На покана на Оланд, ќе присуствува и британскиот премиер Дејвид Камерон. „Ја примив поканата од претседателот Оланд да се приклучам на митингот на единството во Париз во недела, во поддршка на вредностите, кои ги поддржува Charlie Hebdo“, изјави Камерон.
Во поворката, исто така, учество ќе земе и германската канцеларка Ангела Меркел, и премиерот на Финска, Александер Стуб. Доаѓањето во Париз го потврдија и италијанскиот премиер Матео Ренци, шпанскиот Мариано Рахој.
На маршот против тероризмот во недела во Париз, исто така, ќе учествуваат и многу други француски и странски политички челници, меѓу кои и поранешниот француски претседател Никола Саркози, како лидер на опозициската конзервативна Унија за народно движење (UMP).
Лидерката на крајно десната партија Национален фронт (FN), Марин Лепен, пак не добила покана од организаторите да учествува на маршот. „Тие велат дека Националниот фронт не е добредојден гостин на митингот, каде што се поканети другите партии. Национално единство веќе нема, бидејќи тие го разрушија“, смета Лепен.
Според анкетата објавена кон крајот на декември што ја спровела агенцијата Odoxa, по порачка на весникот Le Parisein, Никола Саркози и Марин Лепен се во моментов најпопуларните политичари во Франција.
Големата ткн „републиканска“ поворка ќе се одржи на повик на речиси сите политички, верски и синдикални челници. Предвидени се и собири во сите поголеми градови во Франција./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Грузија сака да донесе закон за „странски агенти“, oфицијален претставник на ЕУ: Неприфатливо
Висок функционер на Европската унија денеска ја предупреди грузиската влада дека предложениот закон за „странски агенти“ е неприфатлив и ќе претставува пречка во напорите на земјата да се приклучи кон ЕУ, доколку биде усвоен во сегашната форма.
Грузискиот парламент вчера го усвои законот во второто читање, за кој опозицијата вели дека е инспириран од Кремљ, додека полицијата употреби солзавец и шок-бомби за да ги растера толпата демонстранти.
Владата смета дека законот е неопходен за да се гарантира транспарентно странско финансирање на невладините организации.
Секоја вечер, речиси еден месец, се поголем број демонстранти излегуваат на улиците. Вчера десет илјади демонстранти го блокираа центарот на Тбилиси на најголемиот антивладин митинг организиран досега.
Герт Јан Купман, директор на Управата за проширување на Европската комисија, за новинарите во главниот град на Грузија изјави дека Брисел ја следи ситуацијата и е загрижен за тоа што се случува.
„Гледаме загрижувачки случувања кога станува збор за законодавството. Законот за транспарентност, кој беше усвоен во второ читање, е неприфатлив во сегашната форма и ќе создаде сериозни пречки на патот кон пристапување во ЕУ“, рече Купман.
„Но, има уште време. Во септември ќе излеземе со препораки дали да ги започнеме пристапните преговори со Грузија и да објавиме извештај во октомври и ноември, така што има уште време. Но, сега топката кај владата“, додаде тој.
Грузискиот парламент се очекува да го разгледа законот во третото читање за околу две недели.
Европа
Русија: Не ја гледаме поентата на мировната конференција во Швајцарија
Русија објави дека не ја гледа поентата на конференцијата за прекин на огнот во Украина што Швајцарија ја планира за средината на јуни и на која Москва не беше поканета. Швајцарската влада соопшти дека Русија „во овој момент“ не е меѓу десетиците поканети земји, додавајќи дека е отворена за нејзино учество, но дека Москва не е заинтересирана. Берн го најави собирот во јануари, велејќи дека го организирал на барање на украинскиот претседател Володимир Зеленски.
Портпаролот на Кремљ, Дмитриј Песков, нагласи дека Москва не ја смета за веродостојна иницијатива.
„Не разбираме каква пресвртница би била таа мировна конференција“, им рече тој на новинарите. „За каква конференција зборуваме, за каква сериозна конференција со сериозни очекувања дека ќе има некакви резултати, без учество на Русија?
„Тоа е целосно невозможно и јасно е дека тоа е некаква иницијатива која не е фокусирана на резултати“, заклучи тој.
Швајцарската влада соопшти дека „мировниот процес не е можен без Русија. Украина, од друга страна, ги доведува во прашање придобивките од руското учество на состанокот што ќе се одржи во близина на градот Луцерн.
„Знаеме дека нема смисла да ја имаме Русија на маса ако не можете да се осигурате дека таа ќе дејствува со добра волја“, рече шефот на украинската дипломатија Дмитро Кулеба минатата недела во интервју за магазинот „Форин полиси“.
Кулеба смета дека создавањето дополнителен притисок врз Русија на бојното поле и обединувањето на земјите „кои ги делат принципите“ ќе помогнат Русија да биде подготвена да учествува во дијалогот.
Европа
Макрон не ја исклучува можноста за испраќање војници во Украина доколку Русија „ја пробие линијата на фронтот“
Францускиот претседател Емануел Макрон во интервју за Економист изјави дека не ја исклучува можноста за испраќање војници во Украина доколку Русија „ја пробие линијата на фронтот“ и ако Киев тоа го побара од Париз, пренесува BFMTV.
„Доколку Русите ги пробија првите линии на фронтот и ако има украинско барање – што не е случај денес – би било легитимно да се постави тоа прашање“, рече Макрон.
Веќе во февруари, Макрон ја покрена можноста за испраќање западни трупи на украинска територија, потсетува БФМ.
„Како што кажав, не исклучувам ништо бидејќи има некој од другата страна кој не исклучува ништо. Без сомнение, бевме премногу сомнителни кога ги дефиниравме границите на нашата акција”, рече францускиот претседател.
Макрон рече дека „априори отфрлањето“ на можноста за испраќање војници би значело дека „не се научени лекциите од последните две години“, бидејќи во летото 2022 година биле против испраќање тенкови, ракети со долг дострел и авиони. и сега сето ова го испорачуваат во Украина.
„Имам јасна стратешка задача: Русија не смее да победи во Украина. Ако Русија победи во Украина, нема да има безбедност во Европа“, додаде тој.
„Кој може да тврди дека Русија ќе застане таму? Каква безбедност има за другите соседни земји, Молдавија, Романија, Полска, Литванија и толку многу други? И тогаш, каков кредибилитет има за Европејците кои би потрошиле милијарди, велејќи дека тоа е опстанокот на континентот и не би обезбедиле средства за запирање на Русија. Така да, не треба ништо да исклучуваме“, истакна Макрон.