Русија со задоволство ќе му препушти на Западот поголема улога во решавањето на украинскиот судир, изјави во четвртокот рускиот претседател Владимир Путин, а истовремено руското министерство за надворешни работи повторно реагираше на испраќањето странски војници во Украина.

„Во овој момент улогата на сите одговорни членки на меѓународната заедница се зголемува, особено на оние кои имаат вистинско влијание врз украинското раководство“, изјави рускиот претседател Владимир Путин по разговорите во Москва со италијанскиот премиер Матео Ренци, кој, пак, од своја страна порача дека Италија може да помогне во надминувањето на украинскиот судир со своето искуство во децентрализацијата.

Децентрализацијата, имено, е една од точките на мировниот договор потпишан на 12-ти февруари во белоруската престолнина Минск од страна на челниците на Украина, Русија, Германија и Франција, и предвидува поголема самостојност на регионите, во прв ред на одметнатите доминантно рускојазични региони Донецк и Луганск, каде од ланскиот април траат судирите со украинската армија во кои според ОН загинале повеќе од шест илјади луѓе.

Путин притоа додаде дека украинскиот конфликт може да биде надминат само доколку сите страни се придржуваат до договорот од Минск. Тој повтори дека е неопходно власта во Киев да започне директни преговори со рускојазичните бунтовници од истокот на земјата.

Според Путин, разговорите со Ренци околу надминувањето на кризата во Украина, која би требало да доведе и до затоплување на крајно нарушените односи на Европската унија и Русија, биле „пријателски и конструктивни“.

Натамошниот развој на односите е во интерес, како на Русија така и на ЕУ, додаде Путин. „Нашиот разговор беше многу корисен, во вистинско време со оглед на моменталната ситуација во Европа и светот во целина. Разговаравме за билатералните односи меѓу Русија и Европската унија, во полза на нивниот натамошен развој, што објективно е во интерес на Русија и на земјите членки на ЕУ“, рече Путин додавајќи дека двајцата челници размениле мислења во врска со кризата во Украина.

Италијанскиот премиер кој претходно во средата во Киев разговараше со украинскиот претседател Петро Порошенко, изјави дека е подготвен да стори сé што е можно за да се олесни постигнувањето на траен мир. И во Москва и во Киев Ренци изјави дека Италија на Украина ќе и’ помогне со советите за децентрализацијата, имајќи предвид дека германофонското население во италијанскиот регион Јужен Тирол ужива автономија. „Ние сме експерти за тоа“, порача./крај/мф/сн

Извор: РИА Новости