Регион
Тринаесет уапсени за нападот врз Управата за безбедност во Истанбул
Жената којашто го изврши нападот во средата врз стражарите пред Управата за безбедност во турската метропола Истанбул, може да е вклучена во пукањето врз полициско возило во јануари на плоштадот Таксим, а во врска со овие инциденти веќе се приведени 13 лица меѓу кои можеби се и директните соучесници на ликвидираната терористка, објави во средата навечер приватната новинска агенција Дogan повикувајќи се на извори во безбедносните служби.
На 30-ти јануари Елиф Сутлан Калсен отвори оган врз патролно полициско возило, при што користела автомат и пиштол од рачно производство. Во нападот немаше настрадани припадници на полицијата, но напаѓачката успеа да побегне. Жената која е застрелана во средата, можеби е Калсен, според една од опциите коишто ги разгледува истрагата, обидувајќи се да го утврди идентитетот на загинатото лице според отпечатоците од прстите.
Според прецизираните податоци, во нападот на Управата за безбедност полесно се повредени двајца полицајци, кои во моментот на нападот излегувале на улица. Тие отвориле оган откако една жена фрлила граната кон нив. Според соопштението на полицијата, „напаѓачката имала кај себе автомат, две рачни гранати и пиштол“.
Претходно медиумите јавија дека соучесникот на жената во нападот кој е квалификуван како терористички напад и кој успеал да избега, бил ранет и откриен. Подоцна беше потврдено дека жената во моментот на нападот немала помагачи.
Уапсените може да се од групата студенти кои дошле пред зградата на Управата за безбедност за да изразат поддршка на пријателите кои учествувале во еден од неодамнешните протести во Истанбул и биле приведени. Вкупно се приведени 13 луѓе, пишува агенцијата.
Очевидци на денешниот напад велат дека терористката имала помош можеби и од четворица соучесници, кои не учествувале непосредно во нападот, туку го координирале. Не е исклучени тие да се измешале во групата студенти која протестирала, пишува Dogan.
Изминатите два дена Истанбул беше потресен од неколку инциденти. Прво во вторникот државниот обвинител Мехмет Селим Кираз, кој беше тешко ранет во полициската акција со којашто во вторникот навечер беше завршена повеќечасовната заложничка драма, доцна вечерта им подлегна на повредите. Тој ја водеше истрагата за смртта на 15-годишниот Беркин Елван, кој почина во 2014 година по речиси деветмесечна кома, откако во летото 2013 година беше погоден во главата од полициски патрон со солзавец истрелан при антивладините протести во истанбулскиот парк Гези. Тој беше земен во заложништво од двајца активисти на забранетата турска екстремна левичарска група Револуционерен фронт за народно ослободува (DHKP-C), кои беа убиени во текот на полициската акција.
Во средата претпладне, пак, полицијата уапси вооружен маж кој упадна во седиштето на турската владејачка Партија на правдата и развојот (AKP) во предградие на Истанбул, ги избрка сите присутни во објектот а преку еден од искршените прозорци го истакна турското национално знаме со дополнителен мотив – бела сабја. За овој инцидент./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
(Видео) Една година од масакрот во училиштето во Белград, беа убиени девет ученици и чуварот
Помина точно една година од трагедијата во училиштето „Владислав Рибникар“ во Белград, кога Коста Кецмановиќ вооружен со пиштолот на татко му уби девет ученици и чуварот на училиштето, а рани уште неколку.
На местото на трагедијата пристигнуваат се повеќе луѓе за да им оддадат почит на жртвите. Први пристигнале членовите на семејствата на убиените деца, а глетката пред училишната зграда никого не остава рамнодушен, објавија српските медиуми.
На посебно плато пред училиштето, каде се поставени фотографиите и имињата на убиените деца и чуварот, се оставаат цвеќиња и се палат свеќи.
И претседателот на Србија, Александар Вучиќ, утрово положи цвеќе во ОУ „Владислав Рибникар“.
„Помина една година од невидената трагедија која остави неизбришлива лузна на душата на целата земја, но болката, неверувањето и неизмерната тага не поминаа“, рече Вучиќ.
На 3 мај минатата година Коста дошол вооружен во училиштето и од влезната врата го започнал својот крвав поход, во кој животот го загубија девет деца и чуварот.
Откако го извршил масакрот повикал полиција и пријавил што направил.
Веднаш по трагедијата се одржа вонредна конференција на српското Министерство за внатрешни работи, на која беа соопштени деталите за она што се случи во училиштето „Владислав Рибникар“.
„Повикот дојде во 8 часот и 42 минути наутро, две минути по пријавувањето на случајот во полиција од страна на заменик директорот на ова училиште“, изјави началникот на белградската полиција Веселин Милиќ.
На таа конференција Милиќ изјави и дека К.К. еден месец го планирал злосторството. Тој го покажа и списокот што полицијата го пронашла во станот на момчето убиец, на кој биле испишани имињата на учениците кои планирал да ги убие.
Дополнително, како што тогаш беше кажано од највисоките функционери на српската полиција, К.К. имал и прецизен план на училиштето, со означен влез и излез.
Поради делото, Коста е во болница, а против татко му и мајка му, Владимир и Миљана Кецмановиќ во меѓувреме е покренато обвинение, со оглед на тоа што момчето-убиец во моментот на делото имало 13 години и затоа не е кривично одговорен.
Вишото јавно обвинителство во Белград соопшти дека обвинетиот Владимир Кецмановиќ во периодот пред трагедијата го научил својот син да пука во цели во форма на концентрични кругови и силуети на луѓе, да стои и да дише кога користи огнено оружје.
Против семејството Кецмановиќ се водат три граѓански постапки, а поднесени се вкупно пет тужби, меѓу кои и една кривична.
Регион
(Видео) Избрана е новата Влада на Србија
Собранието на Србија со 152 гласа ја изгласа новата Влада на премиерот Милош Вучевиќ. Два дена траеше расправата за составот на Владата и нејзиниот план за работа, при што опозицијата го оспори кредибилитетот на Вучевиќ, посочувајќи дека, како и досега, за секоја одлука ќе биде прашан претседателот на државата Александар Вучиќ.
Новата Влада на Србија брои 31 член, од кои една третина се нови имиња во споредба со претходната Влада на чело со Ана Брнабиќ.
Премиерот Вучевиќ претходно изјави дека длабоко верува во историскиот договор меѓу Србите и Бошњаците и рече дека сака добри односи и со Хрватите. Истовремено, тој рече дека нема да ги гради овие односи на штета на сопствените интереси и дека Србија нема да се откаже од традиционалните пријатели.
Посебно внимание предизвикаа двајцата министри кои се под санкции на САД: Александар Вулин ќе биде вицепремиер, а Ненад Поповиќ ќе биде министер без ресор.
Регион
Договорен текстoт на резолуцијата за Сребреница
Предлогот за резолуција за комеморација на геноцид врз Бошњаците од Сребреница, извршен во јули 1995 година, е договорен, а за него треба да се расправа на седницата на Генералното собрание на Обединетите нации, потврди амбасадорот на БиХ во ОН, Златко Лагумџија.
Лагумџија на социјалната мрежа „Икс“ објави дека процесот на усогласување на резолуцијата, чии формални предлагачи се Германија и Руанда, е завршен и испратен до претседателот на Генералното собрание на ОН, Денис Френсис, па нејзиниот текст ќе биде претставен до земјите членки. на светската организација, од која се очекува поддршка.
Резолуцијата повикува да се воспостави 11 јули како меѓународен ден на сеќавање на жртвите на геноцидот во Сребреница, уште еднаш се осудуваат сите дејствија со кои се величат сторителите на воени злосторства, злосторства против човештвото и геноцид утврдени со пресудите на меѓународните судови. Ја нагласува важноста од завршување на потрагата по останките на преостанатите жртви кои досега не се пронајдени и повикува на продолжување на гонењето на сторителите на геноцидот кои се уште се на слобода.
Резолуцијата има намера да ги повика сите држави целосно да ги почитуваат своите обврски од Конвенцијата за спречување и казнување на злосторството геноцид, да го почитуваат меѓународното обичајно право за спречување и казнување на геноцид и да ги почитуваат релевантните одлуки на Меѓународниот суд на Правдата (МСП).
Од генералниот секретар на ОН се бара да воспостави информативна програма наречена „Геноцид во Сребреница и Обединетите нации“, која треба да се спроведе пред следната година, кога се одбележува 30-годишнината од тоа злосторство.
Сите земји-членки на ОН, како и невладините организации и граѓанското општество, предлагачи на резолуцијата истовремено повикуваат на соодветни активности за комеморација и чест на жртвите на геноцидот во Сребреница во 1995 година.
Македонија е коспонзор на оваа резолуција.
Српскиот претседател Александар Вучиќ и лидерот на босанските Срби Милорад Додик инсистираат дека оваа резолуција е обид да се наметне колективна вина врз српскиот народ.