Поранешниот директор на романската надворешна разузнавачка служба SIE, Јоан Талпеш не ја исклучува можноста дека во ткн „транзитен центар“ на американската CIA во Романија имало затвореници, додавајќи дека Букурешт не бил запознаен со активностите на Американците во тој центар.

„Тука беше центар кој Американците го водеа од почетокот, а романската страна не ја интересираше што Американците работат, бидејќи сакавме да им докажеме дека можат да ни веруваат“, вели Јоан Талпеш во интервјуто за дневниот весник Adevarul.

„Можеби имаш еден од два центра. Доколку ги имало, во еден најверојатно биле доведувани затвореници. Она што е сигурно е дека не бевме известувани за присуство на затвореници“, истакнува Талпеш, советник за безбедност на поранешниот романски претседател Јон Илиеску, од 2000 до 2004 година.

Според него, по терористичките напади врз САД од 11-ти септември 2001 година. кога Букурешт сакал да добие покана за членство во НАТО, Романија и САД преговарале за „центри за организирање помош на CIA коишто Романија би им ги ставила на располагање на претставниците“ на американската Централна разузнавачка агенција, за тие да можат „да ги организираат активностите коишто имале намера да ги преземаат на територија на друга земја“. „Тие центри од самиот почеток не беа нарекувани затвори. Стануваше збор за транзитни центри“, додава.

Според извештај на американскиот Сенат за свирепите методи на испрашување на осомничени припадници на Ал Каеда, вкупно 119 лица биле уапсени и заточени во ткн „црни места“ во земји чиишто имиња не се објавени, но запознаени извори за медиумите велат дека станува збор за Тајланд, Авганистан, Романија, Полска и Литванија.

Романија никогаш не го призна постоењето на тајните затвори на CIA на своја територија. Поранешниот претседател Илиеску претходно седмицава изјави дека „не знае ништо“ за тоа, а актуелниот премиер Виктор Понта рече дека на сите прашања во врска со оваа тема мора да одговори министерството за надворешни работи. Агенцијата AFP истакнува во саботата дека романската дипломатија не сакала да коментира./крај/мф/сн

Извор: AFP