Надворешна политика
Македонија повторно ќе остане без датум за пристапни преговори со ЕУ
Европскиот совет и оваа година, по шести пат ќе ја одбие препораката од Европската комисија за почеток на пристапните преговори за членството на Македонија во ЕУ, а заклучоците на Европскиот совет ќе бидат идентични како на оние од претходниот декември самит, односно дека „Советот ќе се наврати на ова прашање во 2015 година“, пренесува МИА.
Советот ќе потврди дека политичките критериуми во земјата продолжуваат да бидат доволно исполнети и дека се зема предвид препораката од Европската комисија за почеток на пристапните преговори, но дека ќе се наврати на прашањето во 2015 година, „врз основа на ажурирање од страна на Комисијата за спроведување на реформите, вклучувајќи го и Пристапниот дијалог на високо ниво (ХЛАД), како и видливите преземени чекори за промовирање на добрососедските односи и за постигнување на компромисно и меѓусебно прифатливо решение за прашање за името“.
Заклучоците ќе бидат усвоени на Советот за општи работи (ГАК) а потоа и формално констратирани на Европскиот совет на 19-ти декември. Од страна на Советот ќе биде евидентирана и политичката криза во земјата и ќе се нагласи потребата за поконструктивен политички дијалог.
„Одговорност е и на владата и на опозицијата да обезбедат политичката дебата да се одвива главно во Парламентот и да придонесат за создавање на негово правилно функционирање. Што се однесува до меѓуетничката ситуација, потребно е да се гради поголема доверба меѓу заедниците и прегледот на Охридскиот рамковен договор се уште треба да се заврши и неговите препораки да се имплементираат“, стои во предлог-заклучокот на Советот за Македонија.
Во поглед на добрососедските односи и прашањето за името пак, Грција инсистира во заклучоците да влезе и реченицата дека „тоа не може да се користи како изговор за недостатокот на напредок во реформите кои се во интерес на земјата, како и дека треба да се избегнат акции и изјави што негативно влијаат на добрососедските односи“.
Се очекува министрите за надворешни работи на земјите-членки на ЕУ да ги усвојат овие заклучоци на 16-ти декември, во рамките на Советот за општи работи, а Европскиот совет потоа ќе ги потврди на самитот кој е закажан за 18-ти и 19-ти декември./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Муцунски во прва работна посета на Брисел на средби со генералниот секретар на НАТО и високи претставници на ЕУ
Министерот за надворешни работи и надворешна трговија, Тимчо Муцунски, од Луксембург продолжува во прва работна посета на Брисел, во чии рамки ќе се сретне со генералниот секретар на НАТО, Јенс Столтенберг, како и високи претставници на Европската Унија.
Во фокусот на разговорите ќе бидат евроинтегративниот процес на државата, реформските процеси, како и активностите во рамките на НАТО, со посебен фокус на претстојниот аамит на алијансата, што ќе се одржи идниот месец во Вашингтон.
Посетата на Муцунски на Брисел на почетокот на мандатот како министер за надворешни работи и надворешна трговија е показател за цврстата определба на земјата за што побрзо членство во Европската Унија и посветениот придонес кон глобалниот мир и регионалната стабилност како кредибилна земја членка на НАТО.
Македонија
Муцунски се сретна со Вархељ: Новата Влада е силно посветена на реформската агенда и европските интеграции
Министерот за надворешни работи и надворешна трговија, Тимчо Муцунски, се сретна со еврокомесарот за соседство и проширување, Оливер Вархељ, во Луксембург.
Во фокусот на разговорите беа приоритетите и активностите на новата Влада, како и актуелностите поврзани со европското досие на земјата.
„Новата Влада е силно посветена на реформската агенда и европските интеграции, а во периодот што следува ќе преземеме низа активности во насока на забрзување на нашиот евроинтегративен процес. Политиката на проширување на ЕУ е најдобрата алатка за поттикнување на реформските и демократските процеси, но истовремено е и клучна геостратешка инвестиција во мир, стабилност и економски развој на земјите од регионот, но и Европа како целина“, нагласи Муцунски.
Соговорниците разменија мислења и за планот за раст на ЕУ оценувајќи го како силна поддршка од страна на ЕУ за економско зајакнување на земјите од Западен Балкан, поттикнување на регионалната соработка, но и доближување на земјите од регионот поблиску до ЕУ и пред формалното членство.
Македонија
Средба на претседателите на Собранијата на Македонија и Украина, Митрески и Стефанчук
Претседателот на Собранието на Република Северна Македонија, Јован Митрески, во рамките на посетата на Киев по повод втората годишнина од почетокот на руската воена агресија врз Украина, оствари средба со претседателот на Врховната рада на Украина, Руслан Стефанчук.
Претседателот Митрески изрази благодарност за поканата и нагласи дека посетата претставува потврда на цврстата и непоколеблива поддршка на Република Северна Македонија за Украина, на сите полиња. Тој нагласи дека уште од самиот почеток силно ја осудуваме руската агресија против Украина, континуирано ја потврдуваме нашата поддршка за украинскиот територијален интегритет, суверенитет и целовитост и изразуваме целосна поддршка на правото на самоодбрана на земјата.
Претседателот на Собранието истакна дека Северна Македонија целосно се приклучи на сите рестриктивни мерки и санкции на ЕУ кон Руската Федерација, ко-спонзорираше бројни резолуции и иницијативи во однос на Украина, а упати и воена и хуманитарна помош за земјата.