Бугарија не гледа алтернатива за сегашните испораки на рускиот природен гас за Европа, изјави во четвртокот бугарскиот вицепремиер Ивајло Калфин на средбата во Москва со челникот на рускиот Совет за меѓународна политика, Константин Косачев.
 

Бугарија не гледа алтернатива за сегашните испораки на рускиот природен гас за Европа, изјави во четвртокот бугарскиот вицепремиер Ивајло Калфин на средбата во Москва со челникот на рускиот Совет за меѓународна политика, Константин Косачев.

„Европа сега се обидува да ги ограничи испораките на руски гас, но во дадениов момент за тоа нема алтернатива. Тоа не е само мој став, тоа е позицијата на владата на Бугарија, зашто заеднички работевме да обезбедиме најкорисно за двете страни снабдување со руски гас на Европа“, изјави бугарскиот вицепремиер Ивајло Калфин.

Рече дека не гледа економска оправданост во намалувањето на испораките на руски гас во Европа. „Сега Русија доставува околу 40 отсто од севкупните европски потреби од гас, притоа во земјите од Централна и Источна Европа овие бројки достигнуваат и до 80 отсто“, рече Калфин. Бугарскиот политичар истакна дека при разработката на транзитните рути за бугарската страна ќе бидат важни условите под кои ќе биде испорачуван гасот.

Калфин посочи и дека бугарската економија трпи штети од санкциите што Европската унија ги воведе против Русија, поради нејзината наводна улога во украинската криза, како и од контрасанкциите што ги воведе Москва, и оти сегашната ситуација не може да ја задоволи владата во Софија. „Економските санкции, претставува проблем за нас. Бугарија, исто така, трпи загуби од санкциите и контрасанкциите коишто ги воведе Русија“, рече Калфин во текот на неговата посета на Москва.

Бугарскиот вицепремиер укажа и за завршување на тешкиот период во односите меѓу ЕУ и Русија може да се зборува само доколку се разреши ситуацијата во југоисточна Украина. „Бугарија секогаш го имала и ќе го има, веројатно не толку гласно како некои други, ставот дека ситуацијата на истокот од Украина мора да биде надмината, и дека сите треба да придонесеме за тоа“, порача Калфин.

Истакна, исто така, дека за Бугарија „Русија е многу важен партнер, а „односите меѓу Бугарија и Русија меѓу двата народа се многу топли и пријателски“.

Од друга страна, рускиот политичар Косачев констатираше дека Бугарија, сменувајќи го „векторот на својата геополитичка ориентација“ кон НАТО и ЕУ, може „во рамките на тие организации да ја зазема својата сопствена улогата во смисла на соработката меѓу тие организации и Русија“.

„Ние сметаме дека овој очигледен потенцијал на Бугарија многу малку е користен, и со жалење можевме да констатираме дека токму Бугарија беше несовладливата пречка на патот за реализација на проектот Јужен тек“, рече претседателот на рускиот Совет за меѓународна политика, Константин Косачев.

Рускиот претседател Владимир Путин на 1-ви декември, при посетата на турската престолнина Анкара по средбата со својот домаќин турскиот претседател Реџеп Тајип Ердоган, објави дека Москва се откажува од проектот Јужен тек. Веднаш потоа беа потпишани договори со Турција за изградба на гасовод по дното на Јужно Море, кој ќе излегува на турско копно, наместо претходно планираното во Бугарија.

Веќе истиот ден „Газпром“ и турската компанија „Ботас“ потпишаа меморандум за разбирање за изградба на гасовод преку Црното Море со капацитет од 63 милијарди кубни гас годишно, исто како и Јужен тек. Од ова количество, 14 милијарди кубни метри гас ќе бидат наменети за Турција, којашто најверојатно добива и повластена цена, а другите 49 милијарди кубни метри руски гас ќе бидат пренасочени кон гасниот центар на границата меѓу Турција и Грција.

Путин оваа одлука ја објави, како што рече, поради опструкциите и „неконструктивната позиција“ за негово градење од страна на Европската унија. Овој гасовод требаше, исто така, по дното на Црното Море да ја заобиколи Украина, и да излезе на копното во Бугарија, да минува низ Србија, Унгарија и Словенија до Австрија и Италија. /крај/мф/сн

Извор: ТАСС