Во два одделни сообраќајни инциденти што се случиле вчера во Скопје и околината, две жени пешаци се здобиле со тешки телесни повреди, по што биле пренесени на лекување.

Првата несреќа била пријавена во раните утрински часови. Околу 06:50 часот, во селото Петровец, во општина Петровец, патничко возило „шкода“ со скопски регистарски ознаки, управувано од 46-годишниот Д.К. од Петровец, удрило во 61-годишната Ј.Ц. од Скопје. Жената се здобила со тешки телесни повреди, кои биле констатирани во Градска општа болница „Св. Наум Охридски“. На местото на настанот бил извршен увид од увидна екипа на СВР Скопје.

Неколку часа подоцна, околу 12:00 часот, уште една жена била тешко повредена во сообраќајна несреќа во Скопје. На крстосницата меѓу улиците „Московска“ и „Женевска“, патничко возило „цитроен“ со скопски регистарски ознаки, управувано од 54-годишниот В.Т. од Скопје, удрило во 74-годишната Љ.В., исто така од Скопје. И во овој случај, повредите биле оценети како тешки и биле констатирани во Градската општа болница „Св. Наум Охридски“. Увид на местото извршила увидна екипа од СВР Скопје.

Се преземаат мерки за целосно расчистување на двата случаи.

Ноќеска во 01:45 часот, полициски службеници од СВР Куманово го лишија од слобода 30-годишниот А.С. од село Романовце, кумановско. Тој е затекнат во куќа во село Романовце, сопственост на Х.Ш., при обид да одземе предмети.

Вчера во 16:40 часот, полициски службеници од СВР Куманово го лишија од слобода 32-годишниот У.З. од Куманово. Тој се сомничи дека на 01.01.2026 со употреба на сила влегол во деловен простор на плоштад „Нова Југославија“ во Куманово и одзел предмети.

Тие се приведени во полициска станица и по целосно документирање на случаите против нив ќе следуваат соодветни пријави.

Вчера во 23:30 часот во Кичево, полициски службеници од ОВР Кичево го лишија од слобода Б.С.(45) од Кичево. При сообраќајна контрола е сопрено патничко возило „фолксваген“ со кичевски регистарски ознаки, кое го управувал и по преземени мерки е констатирано дека е под дејство на алкохол, односно измерени му се 1,60 промили алкохол во крвта.

Вчера вечер, во 22:10 часoт во село Челопек, општина Старо Нагоричане, полициски службеници од СВР Куманово го лишија од слобода О.С.(48) од Куманово. При сообраќајна контрола е сопрено возило „фолксваген“ со кумановски регистарски ознаки, кое го управувал и по преземени мерки е констатирано дека е под дејство на алкохол, односно измерени му се 2,28 промили алкохол во крвта.

По целосно документирање на случаите против нив ќе биде поднесена пријава по член 297-а од Кривичниот законик – „безобѕирно управување со моторно возило“.