На територијата на Скопје изречени се вкупно 245 казни за сообраќајни прекршоци, информираат од министерството за внатрешни работи.

Меѓу нив за непочитување на брзина на движење казнети биле 39 возачи, 35 санкции биле изречени за возење без возачка дозвола, 11 за некористење сигурносен појас.

МВР соопштува дека 10 казни биле изречени за користење на мобилен телефон, 5 за возење под дејство на алкохол и 69 мерки за непрописно паркирани возила.

Засилените сообраќајни контроли продолжуваат и во наредните денови, информираат од МВР.

Тетовската полиција поднесе кривична пријава против Н.М.(49) од село Вешала, управител на угостителски објект, поради сомнение за сторено кривично дело непостапување според здравствените прописи за време на епидемија.

Како што информираат од МВР, на 15. февруари годинава околу 21.35 часот, полицијата во Тетово извршила контрола во локалот и констатирале дека Н.М. постапил спротивно на одлуката на Владата и по дозволеното работно време во објектот имало гости.

За истото кривично дело поднесена е пријава и против Н.З.(64) од Велес, сопственик и управител на локал.

На 24  декември минатата година полициски службеници извршиле контрола во објектот и констатирале дека не се почитуваат владините одлуки, односно објектот работел по дозволеното време и во него имало гости.

Скопското основно јавно обвинителство донесе наредба за спроведување истрага против 23-годишник од Скопје за кривично дело неовластено производство и пуштање во промет на наркотични дроги.

Како што информираат од Обвинителството, при претресот во домот на осомничениот, на улицата Саса во општина Кисела Вода, полицијата пронашла 70 картончиња диетиламит на лизергинска киселина (ЛСД), како и 0,34 грама семки од канабис.

На 23-годишникот судот му определил куќен притвор и му наложил повремено да се пријавува кај службено лице, а исто така привремено му е одземена патната исправа, односно изречена е забрана за издавање нова.​