Полицијата вчера заплени марихуана во Струшко и приведе дилер од Албанија по претходно добиени оперативни сознанија.

Од МВР информираат дека полициските службеници сопреле патничко возило со гостиварски регистарски таблички, кое е во сопственост на А.С. (41) од с.Лакавица-Гостивар, а управувано од Ф.Ц. (20) од Р.Албанија. Во возилото биле и Б.Л. (34) и Т.Е. (26), двајцата од Албанија.

„При преглед на возилото и лицата, била пронајдена марихуана што му припаѓала на Ф.Ц..Лицата се приведени во полициска станица, а Ф.Ц. е задржан за натамошна постапка и по документирање на случајот ќе биде поднесена соодветна пријава до надлежното обвинителство“, велат од МВР.

Кичевската полиција денеска во пладневните часови го уапсила Ф.И. 30-годишен дилер од овој град.

Како што информираат од МВР, по претходно добиени оперативни сознанија, на улицата Прилепска во Кичево бил запрен мотоцикл управуван од 30-годишникот, при што кај него биле пронајдени 38 паковки со хероин и три паковки со марихуана наменети за продажба.

Против Ф.И. ќе биде поднесен соодветен поднесок до надлежното обвинителство.

Од СВР-Штип, во текот на вчерашниот ден регистрирале два случаја на силувани малолетнички, кои во полиција ги пријавиле роднини на девојчињата.

Првиот случај во штипската полициска станица околу 13.20 часот го пријавила 57-годишна жена, која рекла дека претходниот ден околу 16 часот била извршена обљуба врз нејзината малолетна внука, од страна на лице кое исто така било малолетно.

Како што информираат од МВР, вториот случај во Кочани бил пријавен вчера во 14.30 часот.

„Маж пријавил дека околу 00.30 часот, Х.Н. извршил обљуба врз неговата малолетна ќерка. Се работи на комплетирање на случајот по што против Х.Н. ќе биде поднесена пријава“, се вели во соопштението на СВР-Штип.