Топ
(Видео) Девет уапсени за уривањето на хотелот „Шар Ан“ прогласен за културно наследство, меѓу нив и ексдиректори
Денеска Одделот за сузбивање на организиран и сериозен криминал во координација со Одделот за специјални полициски операции, под раководство на надлежен Јавен обвинител од Основно јавно обвинителство за гонење на организиран криминал и корупција, по повеќемесечно криминалистичко истражување спроведе координирана полициска акција, во којa беше сузбиена повеќечлена организирана криминална група составена од лица од Скопје и едно лице од Тетово, кои подолг временски период беа инволвирани во вршење на кривични дела од областа на економски криминал и кривични дела против културно наследство, извести МВР.
Во текот на денот, по добиени судски наредби, извршени се претреси кај 11 физички лица (10 во Скопје и едно во Тетово), а во тек се претреси во девет правни субјекти во Скопје. Притоа, од слобода се лишени девет лица, додека по две лица се трага. Притоа пронајдена е и одземена документација, мобилни телефони, СИМ картички, УСБ уреди, растителна материја, два пиштоли, муниција, пари во различни валути.
Единицата за финансиски истраги во Секторот за криминалистички истраги при ОСОСК по спроведените претреси и пронајдени предмети, како и врз основа на претходно обезбедени материјални докази, до ОЈО за ГОКК поднесе кривична пријава против 11 лица (10 од Скопје и едно лице од Тетово), на возраст од 31 до 64 години, поради сомнение за извршени кривични дела „злосторничко здружување”, „злоупотреба на службената положба и овластување“ и „оштетување или уништување на добра под привремена заштита или културно наследство или природни реткости“, соопшти МВР.
Имено, прво пријавениот М.Љ., во својство на службено лице—претседател на Одбор на директори во АД за изградба и стопанисување со станбен и со деловен простор, во периодот од октомври 2022 до септември 2023 година, со неизвршување на својата службена должност за заштита на деловниот простор од значење за Републиката и со намера да прибави за себе и за членовите на злосторничкото здружување противправна имотна корист, извршил противправно рушење, односно уништување на автентичниот објект Хотел „Шар Ан“, кој како дел од Старата скопска чаршија со Закон е прогласен за културно наследство. М.Љ., иако знаел дека автентичниот објект е културно наследство во сопственост на РСМ со право на стопанисување на акционерското друштво, заедно со С.Љ., вработен во правно лице и К.Д., советник во НУ Конзерваторски центар Скопје, формирал злосторничко здружување и заедно со неговите членови: Б.М., управител во правно лице и сопственик на правен субјект од Скопје, Н.И., како и Б.Е., сопственик и управител на правно лице и И.Е., вработен во истото правно лице, преземале низа противправни дејствија за противправно рушење, односно уништување на автентичниот објект Хотел ,,Шар Ан“.
Потоа, тие заедно со останатите членови на злосторничкото здружување: К.Ч., поранешен директор на НУ Конзерваторски центар Скопје, А.А., поранешен в.д директор на Управа за заштита на културно наследство и А.У., поранешен заменик на генералниот директор во Агенција за катастар на недвижности, иако знаеле дека не постои правен основ за упис на промена во Агенцијата, подготвиле документација која ја искористиле со помош на С.С., вработен во Агенцијата за катастар на недвижности, да извршат противправен упис на промена на имотниот лист од градежно изградено во градежно неизградено земјиште и да го променат односно избришат објектот и правото на стопанисување на АД за стопанисување со станбен и со деловен простор.
Со наведените противправни активности, понатаму би се овозможиле понатамошни противправни дејствија од страна на членовите на здружувањето, а С.Љ. да се впише како сопственик на катастарската парцела, со што организаторите би се стекнале со противправна имотна корист за себе и за членовите на злосторничкото здружување, а на државата ѝ нанеле непроценлива штета по однос на статусот на културното наследство, во износ од 180.000.000 денари, се додава во соопштението на МВР.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ДУИ за Балансерот: Тоа е опасен обид за намалување на влијанието на Албанците во јавниот и институционалниот живот на државата
Демократската унија за интеграција најостро ја осудува одлуката на владата со моноетнички легитимитет да ја смени формулата „балансер“ од 29,5% како што произлегува од процентот на вкупното население, на 24,3%, што значи илјадници Албанци помалку во институциите на државата, се наведува во соопштението.
Оваа промена, како што оценуваат, е сериозен удар за досегашните постигнувања за правична и рамноправна застапеност на етничките заедници во државата.
„Промената на формулата да го одразува само резидентното население, а не општото население е јасен обид да се маргинализира албанската заедница, но и да се поткопа придонесот на нерезидентното население кое континуирано придонесува за финансиската стабилност на земјата преку дознаки.
Ова е втора одлука во насока на поништување на резултатите од пописот на населението, прво на ВМРО, а сега на Знам, и ја разобличува неспособноста на вазалите без изборен легитимитет кои го осиромашуваат албанскиот народ во моноетничката власт.
Ние, во ДУИ, ова го гледаме како опасен обид за намалување на влијанието и учеството на Албанците во јавниот и институционалниот живот на државата“, додаваат од ДУИ.
Оваа одлука, како што велат, е во целосна спротивност со духот на Охридскиот договор и со вредностите на демократијата и еднаквоста кои се основни за мирот и стабилноста во земјата.
ДУИ, додаваат од партијата на Ахмети, ќе ги преземе сите неопходни чекори за да се спротивстави на оваа неправедна одлука и да ги заштити правата на Албанците во Северна Македонија.
„Ја повикуваме владата да ја преиспита оваа дискриминаторска одлука и да гарантира правична и еднаква застапеност за сите граѓани на државата“, потенцираат од ДУИ.
Топ
Пратеници на службените електронски адреси добиле заканувачки пораки
МВР соопшти дека вчера во 13.58 часот во Полициската станица Центар, претставник на една политичка партија пријавил дека на 23.07.2024 околу 18.15 часот од непозната електронска адреса на службените електронски адреси на неколку пратеници во Собранието на РСМ била испратена порака со заканувачка содржина.
За настанот била известена и Единицата за економски и компјутерски криминал при СВР Скопје и како што соопшти полицијата се преземаат мерки за расчистување на случајот.
Македонија
Иселениците повеќе нема да ја одредуваат етничката застапеност во државните институции, сменет е процентот на балансерот
Министерот за јавна администрација, Горн Минчев, објави дека се изменети процентите на балансерот, кој од 2022 година ја броеше и дијаспората од пописот.
Тоа значи дека во новата пресметка на балансерот ќе биде вклучен само бројот на резидентното население, според податоците од последниот попис.
Со тоа бројот на Македонци во администрацијата ќе биде од 54,21 на 58,44 проценти, Албанци од 29,52 на 24,30 отсто, Турци од 3,98 на 3,86 проценти, Роми од 2,34 на 2,53 отсто, Срби од 1,18 на 1,30 отсто и Власи од 0,44 на 0,47 проценти.
Во Министерството пристигнати се речиси 120 годишни плана за вработување во институциите од јавниот сектор и од нив само пет се со позитивно мислење.
Министерот Минчев рече дека според процентуалната застапеност во новоформираното министерство, во моментот од 43 до 45 отсто се вработени од етничките заедници, што значи дека балансерот е злоупотребен.
„Тоа е предмет на ревизија. Досегашните анализи укажуваат дека од 100-процентната вработеност, од 18 до 19 отсто ја имаат злоупотребено можноста за искажување припадност на етничката заедница, односно злоупотреба на балансерот“, рече Минчев додавајќи дека се работи за луѓе што се во редовен работен однос и ќе останат на работа.
Пред две недели Минчев најави укинување на балансерот соопштувајќи дека алатката за вработување според националната припадност во државните институции во минатото била предмет на злоупотреби.
Во август 2022 година тогашниот министер Адмирим Алити направи нова пресметка на балансерот, при што процентот на лица што треба да се вработени во државните институции беше пресметан од вкупното население од пописот, што предизвика многубројни реакции. Според Минчев, со тоа Законот за вработените во јавниот сектор не бил почитуван.