Две лица од Кичево се лишени од слобода откако вербално и физички нападнале полициски службеници при сообраќајна контрола во градот, соопштија од полицијата.

Настанот се случил на 24 јануари 2026 година во 00:15 часот, на крстосницата меѓу улиците „Драге Карбуничанец“ и „Прилепска“ во Кичево, кога полициски службеници сопреле патничко моторно возило бмв, управувано од А.А. (31) од Кичево.

Според пријавата, А.А. (31) и Б.М. (20), исто така од Кичево, најпрвин вербално, а потоа и физички ги нападнале униформираните полициски службеници кои вршеле контрола во патниот сообраќај.

По целосно документирање на настанот, против двете лица ќе биде поднесена соодветна пријава.

Две лица се здобиле со тешки телесни повреди во сообраќајна несреќа што се случила на регионалниот пат Тетово – село Јажинце, кај село Слатино, соопштија од СВР Тетово.

Несреќата била пријавена на 23 јануари 2026 година во 11:20 часот, а во неа учествувале две патнички возила мерцедес со тетовски регистарски ознаки, управувани од А.И. (33) од село Доброште и А.Х. (36) од село Нераште, и двајцата од тетовско.

Во сообраќајната несреќа со тешки телесни повреди се здобиле двајцата возачи, додека со телесни повреди се здобил и сопатникот Б.А. (26) од село Нераште, тетовско. Повредите им биле констатирани во Клиничката болница во Тетово.

Увид на местото на настанот извршила увидна екипа на СВР Тетово.

СВР Битола, до Основното јавно обвинителство Битола, поднесе кривична пријава против 46-годишниот М.Т. од Битола поради постоење основи на сомнение за сторени кривични дела „злоупотреба на службена положба и овластување”, „фалсификување исправa” и „употреба на исправа со невистинита содржина”.

Пријавениот, управител во приватна фирма од Новаци, во април и мај 2024 година, со пречекорување на границите на своите службени овластувања, а со намера да прибави противправна имотна корист, нанел штета од 5.453.7000 денари или 88.678 евра на РЕК Битола.

Имено, тој извршил промена на две барања од РЕК Битола (рудник Суводол) до фирмата за набавка на ролни за јаглен за репарирање на лента за јаглен, на тој начин што извршил промена на количината, односно ги преправил првичните појдовни барања кои како документи биле изготвени и таквите фалсификувани барања ги употребил како доказ во правен сообраќај за набавка на гумени прстени.