Во втората недела од 2026 година, состојбата со грипот во земјава се наоѓа на ниво на средна активност, со зголемен број на заболени, но без потреба од воведување претерани мерки, изјави д-р Драган Кочински од Институт за јавно здравје.

Од 5 до 11 јануари регистрирани се вкупно 2.322 заболени лица, што е за 34,6 отсто повеќе во однос на претходната недела. Во споредба со истата недела претходната сезона, бројот на заболени е зголемен за 2,2 пати.

Највисока инциденца на заболување се бележи кај децата на возраст од 0 до 4 години. Заболени лица се регистрирани во 25 региони во државата, при што најмногу регистрирани случаи има во Скопје, а само во Берово, Пехчево и Делчево досега нема ниту еден регистриран случај.

Одговарајќи на новинарско прашање за можноста за продолжување на зимскиот распуст, д-р Кочински истакна дека иако растот на бројот на заболени е забележан неколку недели порано од вообичаено, нема потреба од таква мерка.

„Бројките се очекувани за овој период од годината. Точно е дека засега имаме раст неколку недели порано од очекуваното. Засега сме во средна активност и тоа не дава можност да даваме претерани мерки како што е продолжување на зимскиот распуст. Ја следиме состојбата и доколку има промени, ќе излеземе со соодветни препораки“, изјави тој.

Во однос на училиштата и градинките, од ИЈЗ апелираат децата со симптоми на акутно заболување да не се носат на настава, со цел да се спречи ширењето на заразата.

Како општи мерки се препорачуваат избегнување на простории со голем број луѓе, редовно проветрување, консумирање витамини и минерали, како и останување дома во случај на заболување. Доколку симптомите се влошуваат или не се повлекуваат, граѓаните се упатуваат да се јават кај матичен лекар или инфектолог.

Најдобра заштитна мерка, според здравствените власти, и понатаму останува вакцинацијата.

Од ИЈЗ посочуваат дека пикот на грипот се очекува од крајот на јануари до средината на февруари.

Министерот за надворешни работи, Тимчо Муцунски, појасни што значи одлуката на САД за стопирање на процесот на издавање на визи. Тој кажа дека се работи за пауза за постапки поврзани со иселенички визи.

„Не прекин, не црна листа, туку пауза, ќе напоменам за постапки за иселенички визи“, рече Муцунски.

Министерот појасни дека не е загрозено издавањето туристички визи, студентски визи како и визи во рамки на програмата „Ворк енд травел“.

„Ова не влијае на сите други постапки за издавање на визи за САД. Доколку сте стопанственик, слободно ќе можете да аплицирате за виза, доколку сте студент кој што сака да студира во САД или да оди на ‘Ворк енд травел’ ова значи дека нема никаква пречка за вас. Доколку сакате туристички да патувате, Светското првенство во фудбал ќе се одржи во САД, исто така, ќе може да патувате туристички“, рече Муцунски.

Тој порача дека јавноста во следните шест месеци дополнително позитивно ќе се изненади од тоа што може да се случи во развојот на визната политика на САД кон нашата држава, односно, како што рече, да почнеме да затвораме прашања кои што 20 години се обидуваме да ги затвориме.

Руската дипломатија изрази „сериозна загриженост“ поради најавата на НАТО за дополнително распоредување војници во Гренланд, по состанокот на данските, гренландските и американските лидери во Белата куќа.

„Наместо конструктивна работа во рамките на постојните институции, особено Арктичкиот совет, НАТО го избра патот на забрзана милитаризација на Северот и го зајакнува своето воено присуство под измислениот изговор на растечката закана од Москва и Пекинг“, соопшти руската амбасада во Брисел.

„Изјавите на Вашингтон за Гренланд се користат исклучиво од страна на алијансата за промоција на својата антируска и антикинеска агенда“, се додава во соопштението, осудувајќи ја „агресивната реторика“.

Русија потсетува дека западните дипломати со пристап до разузнавачките извештаи на НАТО цитирани во медиумите признале дека во последните години не се забележани руски или кинески подморници во близина на Гренланд.

„Ова открива дека се поттикнува вештачка хистерија“, се вели во соопштението.

Сепак, во соопштението не се критикува американскиот претседател по име, во време кога тој останува клучен соговорник на Москва во напорите за постигнување мировен договор во Украина. Наместо тоа, Москва го фокусираше својот оган врз НАТО како институција и неговите европски земји-членки, кои исто така ги обвинува за блокирање на мировните напори во Украина.

„Веруваме дека политиката на алијансата за ескалација на конфликтот на Арктикот е контрапродуктивна и исклучително опасна. Арктикот мора да остане територија на мир, дијалог и фер соработка“, тврдат Русите.

Американскиот претседател Доналд Трамп сака таа арктичка територија, под данската круна, да биде дел од САД. Тој нагласува дека Гренланд е важен за „националната безбедност“ на САД, особено за да се ограничи рускиот и кинескиот напредок на Арктикот, и не ја исклучува употребата на сила за да се заземе.

Тој, исто така, изјави дека Гренланд е „витален“ за изградбата на Златната купола, американскиот проект за ракетна одбрана.

„Силите на неколку членки на НАТО ќе бидат на воени вежби во Гренланд во наредните денови“, потврди вчера заменик-премиерот на Гренланд по состанокот во Белата куќа меѓу данските, гренландските и американските лидери.

„Се очекува зголемување на бројот на воени летови и бродови“, изјави Муте Егеде на прес-конференција, осврнувајќи се на вежбите.

Франција, Шведска, Германија, Велика Британија и Норвешка вчера објавија дека ќе распоредат воен персонал во ова арктичко подрачје за извидувачка мисија која, како што објасни извор во француското Министерство за вооружени сили, е дел од данската вежба „Арктичка издржливост“.

Во последните години, Русија се впушти во повторно отворање и модернизација на голема мрежа на воени бази на Арктикот.