Полицијата приведе три лица кои кршеле автомобили што биле паркирани кај дискотеките во Градскиот парк во Скопје.

Вчера утрото околу 02.30 часот, кај дискотека во Градски парк, полициски службеници ги забележале лицата К.П. (23), М.С. (21) и Н.В. (20), сите од Скопје, како се движат и со нозе удираат по паркираните возила и ги оштетуваат. Кога полицајците се упатиле кон нив, лицата почнале да бегаат.

Полициските службеници успеале да ги стигнат, по што лицата биле приведени во Полициската станица Карпош за понатамошна постапка. По целосно документирање на случајот, против нив ќе бидат поднесени соодветни пријави.

Машки труп бил извлечен вчера од водите на река Вардар во село Сараќино, тетовско.

Според информациите на МВР, вчера околу 13.15 часот, М.К. (65) од село Сараќино пријавил дека во реката Вардар имало заглавено тело на машко лице. Полициски службеници извршиле увид на местото и констатирале дека се работи за лицето Г.Ш. (91) од село Стримница, кој на 17 мај бил пријавен за исчезнат.

Лекар од судска медицина извршил преглед над телото и констатирал дека нема траги на насилство. По наредба на Јавен обвинител, телото на починатиот било предадено на семејството.

Македонски државјани на возраст од 41 и 48 години се уапсени на влезот на грчкото пристаниште Игуменица, откако е пронајдена дрога во нивниот автомобил. Дрогата била скриена во внатрешноста на шасијата на автомобилот, а ја открило полициското куче „Леси“. Според грчката крајбрежна служба, тие се обиделе да прошверцуваат шест килограми и 560 грама хероин, спакуван во 13 пакети и скриен во шасијата на автомобилот.

Според тамошните медиуми, уапсените веројатно сакале да се качат на траект за Италија. Дрогата е запленета, како и патничкиот автомобил во кој е откриена.  Ова е трет случај, за помалку од четири дена, кучето со име „Леси“ на грчката полиција да открие шверцери на дрога на пристаништето Игуменица во северозападниот дел на Грција.