Во интерес на јавноста најостро реагираме на целосно шпекулативните информации и невистинити тврдења дека министерот за култура Зоран Љутков потрошил над 50.000 евра за патувања. Потенцираме, потрошените средства за Јапонија кои се споменуваат изнесуваат точно 3.485.080 денари и не се искористени за бројна делегација од Министерството за култура и туризам како што СДС сакаат да прикажат туку наменети се исклучиво за патните трошоци, билети, сместување и дневници за уметниците од НУ Ансамбл Танец“, велат од ВМРО-ДПМНЕ,

Сите службени патувања на министерот Љутков и вработените во МКТ, додаваат, се реализирани со јасна културна и дипломатска агенда.

„Секој трошок е транспарентно објавен и достапен за јавноста. Обидите да се проблематизираат службено оправданите патувања, се класичен пример на сензационализам и манипулација. Сакаме да потенцираме дека патувањето во Јапонија, кое тенденциозно се споменува, е дел од официјална програма за меѓународна културна презентација на државата и е во духот на историскиот Договор за соработка кој беше потпишан минатата година со оваа држава. Единствен критериум при изборот на програмата за Експо Осака е квалитетот! Овој пат наместо препарираниот рис и орел кои беа едни од главните содржини на Експо Дубаи 2021 кога тие владееја , пред јапонската и светската јавност ги нудиме нашите амбасадори, Танец, Ана и Игор Дурловски, Кирил Џајковски и Владимир Василевски-Четкар! Наместо да го поздравиме видливото присуство на нашата држава на овој настан, СДС најбезочно ги омаловажува уметниците, и ја извртува вистината“, пишува во реакцијата.

Злонамерни и лажни се и обвинувањата на СДС за повластување на шоферот на министерот за кабинетски службеник, реагираат од ВМРО-ДПМНЕ на обвинувањата од СДСМ.

„Возач на министерот е лице определено од Службата за општи и заеднички работи и не е кабинетски службеник. Именување на претседател на УО на Македонската Опера и Балет е лице кое е вработено во МКТ но не е кабинетски службеник на министерот за култура и туризам, туку е професионалец кој работи во МКТ 15 години. Да не се навраќаме на потрошените буџетски средства на претходната ваша министерка и на вашите директори кои во исто време беа и директори и селектори и членови на комисии во Министерството за култура“, велат од ВМРО-ДПМНЕ.

Според партијата, сите овие обвинувања се само конструкции и злонамерен обид да се прикријат седумте катастрофални години на владеење на СДС, особено, како што велат, душманскиот однос кон македонската култура.

„Ако е и од СДС партијата која брусеше шахти, го продаде македонскиот идентитет и безочно го понижуваше македонскиот граѓанин на сметка на туѓи интереси – премногу е. На актерката Катерина Илиевска и посакуваме својот талент на интерпретација да го насочи кон театарските сцени, а од СДС очекуваме јавно извинување за искажаните небулози и дезинформации. Доколку тоа не се случи, Министерството ќе ги преземе сите правни мерки за заштита на својот углед и на угледот на своите претставници“, велат од таму.

Сашо Клековски од ФЗО на денешната панел-дискусија, „Кочани е нашиот приоритет“, се осврна на ситуацијата во моментот во однос на рехабилитацијата на лицата што сè уште се лекуваат и со што би се соочило здравството во следниот период.

„Во моментот имаме 12 повредени на лекување во болница – 7 во странство и 5 во земјата. Од овие 12 повредени, кои сè уште се лекуваат во болница, еден сè уште е, условно да кажам, во тешка состојба. За едниот знам дека е на рехабилитација во Словенија. Од другите што се третираат, имаме 16 на ПРП ПРЕКС-третмани, тоа се плазма-третмани, едниот е со збогатување со тромбоцити, другиот е без збогатување со тромбоцити. Шест се на Клиниката за пластична хирургија и 10 има во „Св. Наум Охридски“. На преврски и слични третмани имаме 38 повредени. На физикална терапија се 46 лица“, изјави Клековски од ФЗО.

Тој се осврна на третманите што се применуваат врз повредените.

„Да повторам, нашата одлука за враќање на повредените беше дека имаме 3 болници со капацитет за третмани на овие повредени. Тоа се Клиниката за пластична хирургија, ‘8 Септември’ и ‘Св. Наум Охридски’ и вкупните бројки се дека таму во моментот се третираат речиси повеќе пациенти отколку на кое било друго место. Секако, би го нагласил тука третманот со ПРП, плазма збогатена со тромбоцити или без тромбоцити, што се практицира кај 16 повредени, и одговорно тврдам дека тоа е супериорен третман за намалување на лузните по изгорениците“.

Клековски ги повика сите повредени што имаат каква било дилема, какво било стравување, да се обратат или во „Св. Наум Охридски“ или на Клиниката за пластична хирургија.

„Тоа е најдобриот третман што може да го добијат за повредите во моментот. Најдобар доказ е пациентот Л., чија фотографија беше дистрибуирана пред еден месец на некои од социјалните медиуми, со изгореници на главата, и во тој момент тие изгореници изгледаа како што треба да изгледаат изгореници од тој тип. Не беа инфектирани, немаше гној, значи беа чисти рани, по еден месец, имаме значително подобрување на состојбата на овој пациент, кој се третира на Клиниката за пластична хирургија. Значи, уште еднаш повик до сите да ја прифатат оваа можност“, рече Клековски.

„Во однос на физикалната терапија, мислам дека само еден пациент се третира бидејќи оди на преврски во „Св. Наум Охридски“. Се третира таму, сите други се во Кочани.

Во Кочани имаме 2 физијатри и 4 физикални терапевти за тие 46 пациенти. Во меѓувреме, формиран е пул од 15 физијатри и 6 физикални терапевти од Клиниката во Козле за физикална терапија и од „8 Септември“ и тие ќе бидат на располагање, на испомош на Општата болница во Кочани. Некои од овие физијатри ќе бидат вклучени во процена на состојбата и во текот на рехабилитацијата на овие пациенти“.

Клековски додаде дека е формирана работната група за мониторинг на напредокот на пациентите.

„Досега се оценети речиси 160 повредени, а недостигаат уште 15-ина повредени, кои во моментот на достапноста на работната група не биле достапни во Кочани, но се во комуникација и ќе бидат вклучени“.

Тој нагласи дека ова е процес што нема да има крај, не е процес што ќе заврши и затоа овие 7 лекари од разни клиники од работната група учествувале во приемот на повредените и знаат во каква состојба биле примени повредените.

„Тие ќе прават во бранови оценки на напредокот за да се види дали, како конзилијарен тим, напредокот кај повредените е добар и дали е на добар пат. Кога ќе заврши овој круг, за еден-два месеца ќе има нов круг на постојана контрола на напредокот од сите страни, и од страна на Пластична хирургија, и од страна на Физикална терапија, и од страна на Пулмологија итн“.

Христијан Мицкоски, Панче Тошковски и Коцевски и натаму ги штитат полициските службеници кои имаат директна вина за најголемата трагедија во историјата на Македонија, пожарот во дискотеката Пулс во кој животот го загубија 62-ца млади луѓе, а 200 беа повредени, истакна на прес-конференција Богданка Кузеска, портпаролка на СДСМ.

Мицкоски и Тошковски, вели Кузеска, прават се за да ги прикријат трагите и непосредната одговорност на оние кои кобната вечер донеле одлука да се затворат вратите на дискотеката што непосредно придонеле да има толкав број на жртви од оваа трагедија.

Според неа, власта се обидува да ги заштити и оние кои биле должни да ја затворат дискотеката која кобната вечер работела без никаков документ во целост надвор од законските рамки и прописи и покрај фактот што јавно било објавено дека таа вечер во овој објект се организира забава.

„Не само што власта на Мицкоски ги штити полициските службеници кои се срам за униформата туку и одбива да одговори на конкретни прашања на медиумите поврзани со оперативниот план таа вечер.
Како е можно и од кои причини оперативниот план за акциската контрола на повеќе локали низ Македонија меѓу кои и дискотеката Пулс да биде класифицирана информација, 3 месеци после спроведувањето на акцијата? МВР крие и кои биле оперативните процедури кои ги наложувала оперативната акција, односно крие кој ја дал наредбата да бидат затворени вратите на дискотеката Пулс, чин кој одзел драгоцени минути и секунди кои би значел спасен живот повеќе“.

Власта, додава таа, крие и кој ја дал наредбата да се спроведе акциска контрола во објект кој не смеел да биде отворен таа вечер затоа што немал никаква дозвола за работа, акциска контрола во која еден полициски службеник го загуби својот живот.

Прашува, дали власта го штити началникот на СВР Штип, Дејан Салтировски и дали тој ја дал наредбата да се прави акциска контрола на објект кој воопшто таа вечер не смеел да работи.

„Дали власта го штити Салтировски чиј адвокат бил лично министерот Тошковски? Дали Мицкоски го штити Салтировски затоа што е во кумовски врски со Орце Тодоровски Ефто кој е бизнис партнер во хидроцентралите на Мицкоски? Дали МВР ги класифицирале овие документи затоа што потпис и наредба да се затворат вратите на дискотеката Пулс спротивно на стандардните оперативни процедури при акциска контрола ставил токму Салтировски? Нема одговорност ниту за Драган Казак Петрушев кој спровел наредба спротивна на стандардната оперативна процедура и ги затворил вратите на дискотеката. Нема одговорност ниту за началничката на економски криминал Кристина Јованова која дозволила да организира забави со стотици присутни, фирма со блокирана сметка повеќе од 200 дена која не можела да исплаќа плати и обврски кон добавувачи. Нема одговорност ниту за Томо Донев кој е началник на криминалистичката полиција во Кочани во моментот кога се случува пожарот во дискотеката Пулс“, потсети Кузеска.

Оценува дека трагедијата во Кочани е масовно убиство со потпис на државата, потпис на власта која прави се за да се спаси од одговорност за смртта на 62-ца млади луѓе.

„Обвинителството констатирало во истрагата дека ММММ ДООЕЛ немало дозвола за употреба на пиротехника, ниту имало лице со дозвола за ракување на пиротехника, зошто нема одговорност за инспекторите надлежни за надзор на пиротехниката? Зошто се крие името на фирмата која на црно увезувала пиротехнички средства? Дали се крие кој се потпишал на оперативната наредба спротивна на стандардните оперативни процедури со што било наредено да се затворат вратите?
Дали се работело спротивно на стандардни оперативни процедури“, праша Кузеска.

Потенцира дека СДСМ нема да дозволи никој да ја заташка истрагата за трагедијата во Пулс.