Притвор од 30 дена за трите лица кои се сомничат за силувањето на 19-годишната девојка во Струмица, што се случи пред две недели.

„Осомничените, како соизвршители, на 8 април заеднички грабнале една оштетена со намера да ја присилат на сексуален однос. Тие ја пресретнале жртвата на улица, на сила ја внеле во автомобил и се упатиле кон подземна гаража во центарот на Струмица. Таму насилно ја соблекле и еден од осомничените извршил обљуба“, велат од обвинителството.

Притворените се на возраст од 18, 21 и 25 години.

Во попладневните часови на 22 април во полициската станица Кавадарци лекари од општата болница во овој град пријавиле дека кај нив со тешки повреди бил донесен 40-годишниот П.В. од Росоман.

Според пријавата, тој со повредите се здобил околу 11:30 часот, додека извршувал работни задачи во фирма во селото Дабниште.

Полицијата извршила увид на местото на настанот.

Синоќа околу 21 часот полициски службеници од СВР Скопје на подрачјето на Центар го уапсиле 23-годишниот А.Ф. од Скопје, бидејќи кај него бил пронајден нож со што сторил прекршок од Законот за оружје.

Исто така, тој и не ги почитувал донесените мерки за забрана за движење по 20 часот.

По целосно документирање на случајот, против 23-годишникот ќе бидат поднесени соодветни пријави.