Историски резултати се бележат на овие избори и според премиерот и претседател на ВМРО – ДПМНЕ, Христијан Мицкоски. Тој доцна вечерва кажа дека победиле во првиот круг над 30 општини меѓу кои и општини каде градоначалници досега имаше СДСМ.

„Драги пријатели имаме победа во над 30 општини уште во првиот круг. Разликата е 2:1, некаде 3:1, а некаде и многу поголема. Имаме победа и во општини во кои СДСМ имаше свои градоначалници. Победивме убедливо во првиот круг во Струмица. Дваесет години чекавме на овој ден, дваесет години. Имаме победа и во Делчево, победивме и во Берово, убедлива победа имаме и во Битола, во Прилеп, во Штип, во Кавадарци, во Гевгелија, во Свети Николе, во Охрид во Карбинци, во Демир Хисар, во Новаци, Градско, Бутел, Ѓорче Петров, Гази Баба, Кисела Вода, Сопиште, Илинден. Петровец, Јегуновце, Велес, Радовиш, Ресен и така натаму“, рече Мицкоски.

Во втор круг оди кандидатот за градоначалник на Скопје од ВМРО-ДПМНЕ, Орце Ѓорѓиевски кој до последен момент пред изборниот молк беше уверен дека ќе победи во првиот круг.

„Орце има огромно водство, неколкупати повеќе од својот противкандидат во Скопје. И таму извесен победник е Орце во вториот круг. Водиме во Карпош, таму Сотир се бореше против сите сојузи и подземни игри и сигурен сум дека ќе имаме победа во вториот круг. Јасно е дека граѓаните бараат промени во Карпош“, рече Мицкоски.

Овие избори тој вели дека се и порака за Демократската унија за интеграција.

„Кога Али Ахмети се удираше во гради дека менувал премиери реков полека, смири се, непријатно ќе бидеш изненаден по резултатот. Ова е тој ден. Ова што е најважно е што политиките на етноцентризам, национализам и вештачки теми за орли и зајци и небитни теми за граѓаните, се поразени, а се отвора прашањето за реформи во опозицијата“, рече Мицкоски.

И тој, како и сите останати политичари вечерва повика на обединување во вториот круг во кој, како што рече, нема место за калкулации, поделби и суети.

„Ви благодарам народе на Македониа. Заедно испишуваме историја. Бог да ја благослови Македонија“, рече Мицкоски на крајот од обраќањето вечерва.

Додека Мицкоски зборуваше за победите, во белата палата се скандираше „цело Скопје вмровмски град“ па тој беше принуден да направи паузи, а на почетокот предупреди дека таквото скандирање може да биде извадено од контекст иако е вистина.

Првиот човек на СДСМ, Венко Филипче, соопшти дека партијата на локалните избори победила во три општини во првиот круг – Крива Паланка, Кривогаштани и Богданци.

Изборниот ден го оцени како мирен, со одредени забелешки кои ќе бидат поднеени со ОБСЕ и ДИК. Тој им ја честиташе победата на сите градоначалници кои победија во првиот круг.

Објави дека СДСМ води во уште неколку општини – Центар, Пробиштип, Чучер Сандево, Чешиново, Валандово, Крушево, Лозово, Росоман.

Дополнително, се осврна и на општините во кои се на второто место – Неготино, Македонска Каменица, Ранковце, Дојран, Демир Капија, Зрновци, а очекуваат податоци од уште неколку места.

Тој апелира граѓаните да излезат масовно на гласање во вториот круг.

Овој резултат не е тој што го посакувавме сите, рече Филипче, меѓутоа не е лош резултат со оглед на тоа што во некои од општините имаме зголемување на бројот на гласови.

Со слободен глас и чиста совест граѓаните ставија крај на ерата на една измама и страв отворајќи го патот за нова чесна и одговорна политика, истакнаа од коалицијата „Вреди“.

Во повеќето општини во земјата првите резултати покажуваат широка поддршка за визијата на „Вреди“, за работа, развој и одговорност. Албанците правилно ја прочитаа нашата одоворност и дадоа јасна порака дека повеќе не веруваат во старите приказни на политиката на старв и измама. Со месеци Али Ахмети, Арбен Таравари и Зијадин Села се обидуваат да ги држат Албанците како заложници со нивниот трик на референдумот кој им служеше за политички опстанок. Тие се обидоа да го претворат стравот во кауза, измамата во патриотизам а паниката во политика“.

Албанците веќе не веруваат во стравот како политичка алатка, велат од коалицијата и нагласуваат дека „Вреди“ победи во првиот круг во Чаир, Сарај, Боговиње, Теарце, Желино и Арачиново.

„Во вотриот круг како победници влегуваме во Тетово со многу јасна победа, во Дебар, Брвеница, Долнени и во Струга. Албанците ја испратија најмоќната порака на овие избори. Времето на Али Ахмети заврши. Еарата што ја држеше надежта на Албанците како заложник заврши а започна нова страница, политика на луѓе кои работа, слушаати кои не заплашуваат“, порачаа од „Вреди“.