Скопското Обвинителство донесе наредба за спроведување истражна постапка против две лица што извршиле разбојништво во бензинска пумпа.

Двајцата соизвршители на возраст од 25 и 22 години, на 14 јануари, во раните утрински часови, со автомобил сер паркирале во близина на бензинска пумпа на локалниот пат од село ‘Ржаничино кон Катланово. Се маскирале со блузи што ги приспособиле како фантомки, со отвори за очите. Со ножеви во рацете им се заканиле на вработените барајќи да им го дадат дневниот промет на пумпата. На тој начин тие одзеле 7.815 денари и со возилото се оддалечиле од местото во правец кон селото Бадар, каде што го запреле автомобилот, но набргу биле откриени и фатени од полициски службеници.

Бидејќи постои опасност осомничените да се дадат во бегство, да ја попречуваат постапката со влијание врз сведоците/оштетените или да го повторат делото, јавниот обвинител до судијата за претходна постапка од Основниот кривичен суд Скопје достави предлог за определување мерка притвор.​​

Во текот на вчерашниот ден (16.1.2022) Министерството за внатрешни работи спроведе зајакната акциска контрола на територијата на Република Северна Македонија за санкционирање возила што се движат со брзина поголема од дозволената, при што санкционирани се 230 возачи. Од нив, 16 возилa се движеле со брзина над 50 километри на час повеќе од дозволеното, а едно возило се движело со дури над 70 километри на час повеќе од дозволеното. Притоа 118 возачи ја пречекориле брзината во населено место, а 112 надвор од населено место.

МВР апелира до сите учесници во сообраќајот да ги почитуваат сообраќајните правила и прописи и заеднички да придонесат за побезбедни патишта.

Во водите на реката Пена, во атарот на тетовското село Фалише, денеска било пронајдено телото на 62-годишниот И.Л. од Тетово, за кого на 31. декември било пријавено дека се оддалечил од домот.

По добиената пријава, по И.Л. интензивно трагале екипи на СВР Тетово, а во потрагата биле вклучени и кучиња-трагачи.

Лекар констатирал смрт, а на местото бил извршен увид од страна на полициски екипи во координација со јавен обвинител, по чија наредба телото е предадено за обдукција.