На регионалнот пат Тетово-Скопје, пред влезот во Ново Село, во попладневните часови на 11 ноември, полициски службеници од Тетово запреле автомобил „опел астра“ без регистарски таблички, управуван од 62-годишник од скопското село Бојане.

Во автомобилот тој превезувал огревни дрва без потребните документи.

Како што информираат од МВР, автомобилот и дрвата биле одземени и предадени на Шумската полиција за понатамошна постапка, а 62-годишникот бил уапсен.

Полицијата презема мерки за целосно расчистување на случајот.

Две торби со марихуана се пронајдени во зелениот појас во близина на граничниот премин Ќафасан.

Според информациите на охридската полиција, вчера околу 19 часот, на зелениот граничен појас во близина на граничниот премин Ќафасан, полицијата пронајде две торби со 46 пакувања марихуана, со вкупна тежина од 50 килограми.

На местото каде што се пронајдени двете торби извршен е увид по што тие се подигнати, а дрогата е предадена на вештачење во Министерството за внатрешни работи во Скопје.

Полицијата презема мерки за целосно документирање и расветлување на настанот.

Во текот на изминатите денови на подрачјето на Секторот за внатрешни работи Скопје се случиле 31 сообраќајна незгода, од кои три со тешки телесни повреди, 11 со телесни повреди и 17 со материјална штета.

При сообраќајните незгоди три лица добиле тешки телесни повреди и 17 лесни телесни повреди. Потоа, 138 возачи се санкционирани бидејќи се движеле со поголема брзина од дозволената. Исто така, исклучени се и 95 возачи бидејќи 40 го управувале возилото под дејство на алкохол, 43 возачи управувале возило пред да стекнат право на управување моторно возило и 12 биле возачи почетници.

Од сообраќај се исклучени 32 возила бидејќи 31 возило било нерегистрирано и едно технички неисправно. Исто така, санкционирани се и пет возачи што поминале на црвено светло, тројца не дале првенство на минување пешаци, тројца неправилно се престроиле, двајца неправилно престигнувале и еден не дал првенство на минување возила. Во текот на изминатите денови издадени се 189 мандатни платни налози, а исто така 119 возила се подигнати со „пајакот“.