Кандидатот за градоначалник на Скопје од ВМРО-ДПМНЕ, Орце Ѓорѓиевски, кој наспроти очекувањата, не победи во прв круг, вели дека уште денес ќе продолжи да работи на конечна победа. Ќе им понуди соработка на сите кандидати кои не влегуваат во вториот круг, а со противникот нема да се занимава оти смета дека го нема.

„Уште од денес ќе разговарам со сите кандидати и политички структури кои не влегуваат во вториот круг. Ќе понудам соработка затоа што на Скопје му треба работа, а не политика. Тимот кој ќе го води Скопје ќе биде составен исклучиво од најдобрите. Овој град изгуби премногу време во експерименти. Доста е. Да засукаме ракави и да покажеме дека треба работа“, рече Ѓорѓиевски.

Во вториот круг очекува поддршка од сите граѓани без оглед на политичките партии оти првиот круг покажал недвосмислена победа.

„Јас очекувам да ме поддржат сите граѓани на главниот град. Јас не водам политика, работник сум и сум човек од народот. Нудам подадена рака. Трипати поголема е мојата предност од секој што е зад мене. И дома, во местото каде што живеат,  три спрема еден е мојата победа. Очекувам да расте, на скопјани им е доста од експерименти“, вели Ѓорѓиевски.

Негов противник во вториот круг е Амар Меџиновиќ од Левица со кого вели дека нема да се занимава исто како што не се занимавал и досега со противниците.

„Освен што нудев проекти во првиот круг, не се занимавав со противниците. Некои од нив се осудија и семејството да ми го нападнат, но тоа е ниво на политика кое нема да го видите од моја страна. Тука сум за проблемите на граѓаните, а не за лични битки. Не сум фокусиран на противникот затоа што противник и немаме, јас сум фокусиран на народот, што повеќе раце да стиснам во вториот круг, што повеќе граѓани да сретнам, да им ја објаснам визијата за следните четири години. Одиме поагресивно на терен и се спремаме за средување на хаосот во Скопје“, рече Ѓорѓиевски.

Од дното на срцето им се заблагодари на скопјани за секој глас во првиот круг и кажа дека во вториот круг очекува уше поголема победа.

Ѓорѓиевски освои 39,43 % од гласовите односно 91.612 гласа. Зад него е Мециновиќ од Левица со 13,20 % од гласовите, односно 30.662 гласа.

Македонија е обoена во црвено. ВМРО-ДПМНЕ ја има убедливо најголемата победа на локални избори до сега, било кога видена во Македонија, ова е историја и резултатот кој што го направивме вчера е навистина историски, истакна на прес-конференција Александар Николоски, потпретседател на ВМРО-ДПМНЕ.

Ова, според него е историски резултат затоа што, како што рече, е за 50% подобар од резултатот кој партијата го имала во 2021 година, кога во 22 општини доби градоначалник во првиот круг.

„Добивме градоначалници и во места кои до вчера беа условно кажано предводени од СДСМ, односно во коишто бевме опозиција. Убедливо во првиот круг победивме во бастионот на СДСМ, Струмица, во Струмица ВМРО-ДПМНЕ ќе има градоначалник после 20 години. И не само тоа, туку ќе имаме и мнозинство во Советот и разликата е толку голема што е нешто што е досега невидено на избори во Струмица.

Во првиот круг победивме и во Делчево, Берово, Старо Нагоричане, каде исто така СДСМ имаше градоначалници, а водиме и ќе победиме во вториот круг во Валандово, Демир Капија, Дојран каде што нашите кандидати водат и ќе победат во вториот круг“.

Скопје, кажа Николоски, гласаше за Орце Ѓорѓиевски, каде како што нагласи е јасно уште во првиот круг што Скопје сака.

„Орце води повеќе од 3:1 кон второпласираниот кандидат, повеќе од 3:1 е јасно позиционирање и јасен став на Скопје, што Скопје сака и дека Орце Ѓорѓиевски е изборот и во вториот круг ќе ја зацементираме оваа голема победа.

Она што е карактеристично е дека СДСМ во Скопје е петта политичка партија, не втора, не трета, не четврта, СДСМ во Скопје е петта политичка партија, што јасно ја покажува волјата на граѓаните и јасната доминација на ВМРО-ДПМНЕ во Скопје.

Нашите кандидати Дејан Митески и Сотир Лукровски, убедливо победија во Аеродром и Карпош и се апсолутни фаворити за победа во вториот круг, очекуваме и таму големи победи во вториот круг и во Аеродром и во Карпош.

Можеме официјално да кажеме дека ВМРО-ДПМНЕ доби градоначалник во првиот круг во следните општини: Берово, Битола, Босилово, Бутел, Василево, Вевчани, Велес, Гази Баба, Гевгелија,
Ѓорче Петров и Градско, Делчево, Демир Хисар, Зелениково, Илинден, Јегуновце, Кавадарци, Карбинци, Кисела Вода, Кратово, Новаци, Ново Село, Охрид, Петровец, Пехчево, Прилеп, Радовиш,
Ресен, Свети Николе, Сопиште, Старо Нагоричане, Струмица и Штип“.

Од денес како што рече, идните градоначалници ги чека многу работа а она што го ветија во кампањата мора да го реализираат.

„Во Советот на град Скопје, како што кажав, СДСМ е петта политичка партија. СДСМ е на најниските ниво од своето основањето до денес. Јасно е дека народот праќа јасна порака на двоецот Венко Филипче – Зоран Заев. Оставката е најнормалниот чин на човек којшто доживеал ваков дебакл.

Граѓаните јасно кажаа дека е доста од двоецот Зоран Заев – Венко Филипче.

На овие избори го декласиравме и ДУИ. ДУИ минатата година замина во опозиција, а на овие избори е декласирана. Тие изгубија катастрофално и народот им кажа што мисли за нив и нивната деструктивна и криминална политика.

Не може криминалот да се брани со историски приказни, со измислен наратив и со национална поларизација. И затоа порака и кон ДУИ и Али Ахмети беше многу јасна на вчерашните избори.

Во вториот круг очекуваме уште една голема победа, а потоа силна работа и посветеност за оправдување на довербата која што ја добивме од граѓаните“, истакна Николоски.

Граѓаните во шест скопски општини веќе избраа градоначалници во првиот круг – Бутел, Чаир, Гази Баба, Кисела Вода, Ѓорче Петров и Сарај. Според првичните резултати на Државната изборна комисија, изборната трка продолжува во четири општини, во кои граѓаните ќе гласаат во втор круг – Аеродром, Центар, Карпош и Шуто Оризари.

Во Аеродром, во првиот круг, во водство е Дејан Митески од ВМРО-ДПМНЕ, со освоени 49,09 отсто од пребројаните гласови, одонсно 16.225 гласа. Зад него е Александар Трајановски од СДСМ, кој има 20,79 отсто или 6.872 гласа. Третопласиран е Марјан Димитриев од Левицата со 19,44 гласа, речиси 400 гласа помалку од кандидатот на социјалдемократите.

Во Центар од 100 отсто пребројани гласови, најмногу освои Горан Герасимовски од СДСМ – 38,19 отсто или 8.535 гласа. Тој во вториот круг ќе се соочи со Мирослав Лабудовиќ од Движењето ЗНАМ, поддржан од ВМРО-ДПМНЕ, кој освои 25,54 отсто од гласовите или 5.797 гласа.

Во Карпош најмогу глсови освои кандидатот на ВМРО-ДПМНЕ, Сотир Лукровски, со 34,51 отсто, а зад него е актуелниот градоначалник Стевчо Јакимовски од ГРОМ со 29,40 проценти од глсовите.

Во Шуто Оризари, пак, во вториот круг ќе се соочат Курто Дудуш од Унијата на Ромите, кој освои 36,43 проценти од гласовите, и Ерџан Демири од ВМРО-ДПМНЕ, кој освои 20,81 отсто.

Втор круг ќе има и за градоначалник на Скопје, каде што ќе се соочат кандидатите на ВМРО-ДПМНЕ и на Левицата.