Приведен е бегалец од затвор и биде предаден за доиздржување на затворската казна, информираа од МВР.

„Денеска (26.5.2022), полициски службеници од Единицата за интервентна полиција при СВР Скопје го лишиле од слобода Н.Н.(25) од Скопје. Тој бил баран по потерница за доиздржување затворска казна и поради бегство од казнено-поправна установа“, наведе полицијата.

Лицето ќе биде спроведено во казнено-поправна установа за доиздржување на казната.

Тешко повреден мотоциклист од Скопје по судир со автомобил на крстосницата од улицата Митрополит Теодосиј Гологанов со улицата Њуделхиска.

Сообраќајната незгода се случила вчера утрото меѓу „бмв х3“, со скопски регистарски ознаки, управувано од К. П. (38) од Скопје, и мотоцикл „кавасаки“, со скопски регистарски ознаки, управуван од Б. Н. (28) од Скопје.

Притоа повреди добил мотоциклистот Б. Н. констатирани во Градската општа болница „8 Септември“.

Увид на местото извршила екипа од СВР Скопје.

Едно дете загина, а две лица се тешко повредени во сообраќајна несреќа на автопатот Скопје – Велес.

Според информациите од МВР, вчера, пред наплатната станица „Сопот“, автомобил „рено клио“, со неготински регистарски ознаки, управувано од Д. В. (38) од Неготино, излетало од коловозот. Во несреќата тешки телесни повреди добиле возачот и малолетен сопатник (дете) и биле пренесени во Општата болница во Велес, каде што од лекар била констатирана смрт кај малолетникот.

Исто така, тешки телесни повреди добила и сопатничката В. В. (28) од Неготино, констатирани во комплексот клиники „Мајка Тереза“ во Скопје.

Увид на местото извршиле екипа од СВР Скопје и јавен обвинител по чија наредба телото било предадено на обдукција.