Овој Први мај место марш, Сојузот на синдикати на Македонија (ССМ) најави протест оти платите се мизерни, најниски во регионот, не се зголемуваат согласно потпишаните договори и Владата и работодавачите одбиваат да ја зголемат минималната плата на 500 евра и да ги зголемат сите останати плати за најмалку 100 евра. Претседателот на ССМ, Слободан Трендафилов ги повика синдикатите здружени во ССМ, нивните членови но и сите останати синдикати и поддржувачи на работничките права место на скара да излезат на протест.

„Недостоинствените услови за работа и недостоинствените плати се главниот мотив оваа година на Први мај да протестираме а не да маршираме. Има многу причини за но ниету една против излегувањето на протсет на Први мај. Денеска за жал оргомен број работници во приватниот сектор уште немаат добиено плата з амесец март. Денеска оргомен број институции во јавниот сектор немаат добиено плата за март, 2025 година. Ако тоа што ви се ниски платите, ако тоа што не добивате плата не е доволен мотив да ни се придружите на Први мај тогаш треба да знаете колку ќе дојдете и колку ќе дојдеме толку ќе добиете и толку ќе добиеме. Нѐ бројат и Владата и работодавачите. Поканата е отворена за сите кои сметаат дека треба да се придружат на овој Први мај заедно да покажеме дека минималната плата во Македонија е мизерна односн најниска во регионот. Ако во некоја држава минималната плата е на дното во регионот во Македонија минималната плата го проби и дното. Не е време за пиво и скара, време е за борба за работнички права“, рече претседателот на ССМ, Трендафилов.

Протестот ќе почне во 11 часот пред Работничкиот дом на Први мај. Трендафилов апелираше работниците да покажат единство оти живеат од плата,  не од политика и масовно да излезат да го искажат незадоволството. Тој нагласи дека пет месеци нарочно не се утврдува репрезентативност на ССМ за да не се одржи седница на Економско-социјалниот совет на која Владата ќе мора или да го прифати или да го одбие предлогот на ССМ минималната плата да се покачи на 500 евра.

Министерството за здравство информира дека денеска пет пациенти од повредените во трагедијата во Кочани ќе се вратат од лекување од Клиничкиот центар во Србија по што, во согласност со протоколот, тројца ќе бидат под опсервација на Клиниката за пулмологија и по еден пациент на Клиниката за пластична хирургија и во Хируршката клиника „Св. Наум Охридски“.

Во текот на вчерашниот ден еден пациент се врати од лекување од Хрватска и се наоѓа под опсервација на Клиниката за пластична хирургија, со што во странските медицински центри остануваат на лекување уште 38 пациенти.

Во земјата во моментот се лекуваат 7 пациенти, од кои во Хируршката клиника „Св. Наум Охридски“ се хоспитализирани вкупно 4 пациенти, на Клиниката за пластична хирургија еден пациент, а во приватната болница „Систина“ двајца пациенти.

Министерството за здравство континуирано ја следи состојбата со повредените пациенти со цел обезбедување најдобар можен третман, како и натамошна рехабилитација, нагласуваат од Министерството.

Министерот за животна средина и вицепремиер Изет Меџити очекува министерот за здравство Арбен Таравари и лидер на Алијансата за Албанците, како што ја напушти коалицијата „Влен“ за претстојните локални избори, да ја напушти и Владата. Меџити вели дека синоќа имале седница на Владата, на која, покрај за реализација на програмите и проектите, разговарале и за политичката ситуација.

„’Влен’ нема никакви дилеми, продолжува во таа насока за што и ги побара тие 107 илјади гласа како победник во албанскиот кампус. Како што ветивме – донесовме промена, ротација, плурализам и демократија во албанскиот кампус. Ние стоиме цврсто на тој пат. Тука е проблем господинот Таравари. Ние одлучивме дека ‘Влен’ ќе биде едно, ќе се стопат сите политички партии во ‘Влен’ оти тоа го бараат нашите гласачи. Второ, одлучивме дека и соработка со ДУИ и останување во ‘Влен’ не е можно и мислам дека и соработка со ДУИ и дел од Владата не штима, не оди.  Тоа е нашиот политички став, ист ќе биде и на 29 април и на 1 мај. Нема логика да се соработува со ДУИ и да се биде дел од Владата“, рече денес министерот Меџити по обраќањето на Форумот за енергетика и технологија помеѓу Чешка и Северна Македонија.

Според него, Меџити треба да се определи. Има легитимно право да соработува со ДУИ, но треба да не се срами, да го објави тоа и да премине во тој табор.

Меџити не одговори конкретно на прашањето дали од премиерот Христијан Мицкоски ќе побара Тарвари да ја напушти Владата, но потврди дека е можна средба меѓу нив, на која, без разлика на кој датум ќе се одржи, политичкиот став на „Влен“ ќе биде ист.

Спојувањето на партиите што сега се дел од коалицијата „Влен“, со исклучок на Алијансата за Албанците, е во тек. Меџити извести дека претседателството ќе има 23 члена и дека неговото име е меѓу оние што се споменуваат како кандидати за лидери.