Основното јавно обвинителство Струга отвори предмет против едно лице поради постоење основано сомнение дека сторило кривични дела узурпација на недвижност и оштетување или уништување добра под привремена заштита или културно наследство или природни реткости.

„Осомничениот во повеќе наврати, почнувајќи од август минатата година, ангажирал лица да вршат ископ, тампонирање со земја и други материјали на крајбрежјето на Охридското Eзеро, со што извршил узурпација на природното езеро и уништување добра и природна реткост. Осомничениот спротивно на Законот за заштита на природата преку спомнатите активности преземени во појасот на трски и крајбрежјето ја зголемувал земјишната површина и го уништувал заштитениот појас со трски во Охридското Eзеро, кој претставува живеалиште за ендемични видови. Имено, Охридското Eзеро е класифицирано како споменик на природата, а во согласност со законите, во нeговата непосредна близина не се дозволени активности што ги загрозуваат неговите обележја и вредности“, се наведува во соопштението.

По отворањето на предметот против осомничениот во август 2018 година, надлежниот јавен обвинител презеде дејства во насока на утврдување на фактите. Констатирано е дека активностите што ги презел осомничениот се вршени на земјиште во сопственост на Република Северна Македонија и дека за него тој не поседува соодветни дозволи.

Основното јавно обвинителство Струга во континуитет презема дејства за целосно расчистување на кривично-правниот настан.