Од страна на Единицата за внатрешни работи Центар и Бит Пазар поднесена е кривична пријава против Н.Д.(45) од Скопје, поради основи на сомнение дека сторил кривично дело „измама“, предвидено и казниво од Кривичниот законик.

Имено пријавениот, на 07.03.2021 во с. Долно Лисиче, скопско, со намера да се стекне со противправна имотна корист на оштетениот В.Ц. од Скопје му се претставил како превозник-трговец со огревни дрва, нудејќи му огревни дрва по поволна цена, ако му позајми 14.500 денари за да ја замени гумата од камионот, на кој му се натоварени дрвата за продажба.

Откако ги земал парите, Н.Д. ниту донел дрва, ниту се јавувал.

На тој начин го довел во заблуда оштетениот, кој му ги дал парите и еден мобилен телефон на пријавениот, со што Н.Д. се стекнал противправна имотна корист од околу 20.000 денари.

Денеска, околу 1.30 часот, во Градскиот трговски центар во Кочани, полициски службеници од ОВР Кочани го пронашле и привеле Џ. Џ. (20) од Кочани поради бегство од Казнено-поправната установа „Затвор Струмица“.

При преглед кај него била пронајдена и одземена марихуана.

Тој бил спроведен во Казнено-поправната установа „Затвор Струмица“ и по целосно документирање на случајот, ќе му биде поднесена соодветна пријава.

Во текот на вчерашниот ден Министерството за внатрешни работи спроведе зајакната акциска контрола на територијата на државата за санкционирање возила што се движат со брзина поголема од дозволената, при што биле казнети 263 возачи. Од нив, 22 возилa се движеле со брзина над 50 километри на час повеќе од дозволеното, а осум возила се движеле со дури над 70 километри на час повеќе од дозволената брзина. Притоа 101 возач ја пречекориле брзината во населено место, а 162 надвор од населено место.

Засилените акциски контроли продолжуваат и во наредните денови, најавија од МВР, и од таму апелираат до сите учесници во сообраќајот да ги почитуваат сообраќајните правила и прописи за побезбедни патишта.