Попладнево, околу 15 часот, Единицата за недозволена трговија со дрога извршила претреси во скопско Визбегово, при што пронајдена била мини лабораторија за производство на масло од канабис, информираат од МВР.

Претресите биле спроведени во домот и други простории на 38-годишниот И. П., при што во дворното место пронајдени биле стебла од марихуана во осум саксии и други 12 стебла, од кои некои биле во помошните простории во фаза на сушење, а пронајдена била и мини лабараторијата за производство на масло.

Притоа затекнати биле и две други лица, од кои едното П. В. (38), кој бил затекнат при обработка на марихуаната, како и Г. Ј. (39).

Потоа биле извршени претреси и во домот на 39-годишникот, при што била пронајдена марихуана подготвена за продажба, како и шприцови полни со масло од канабис.

Трите лица се приведени.

Скопската полиција минатиот петок (18 септември) уапсила извесен Р. Ј. за кој Единицата за недозволена трговија имала поднесена кривична пријава под сомнение за сотрени кривични дела недозволено изработување, држење и тргување со оружје и неовластено производство и пуштање во промет наркотични дроги.

На 1 мај годинава, по претходно добиена судска наредба, полицијата извршила претрес на дом и други простории и во пошироката околина помеѓу улиците Алпи и Коце Металец биле пронајдени: автоматско оружје со навој на придушувач, две рамки со 34 куршуми во калибар 7,65 мм и придушувач, две автоматски пушки, полуавтоматска пушка „берета“ со празна рамка и рамка за автоматска пушка со 18 куршуми, автоматско оружје со навој за придушувач, придушувач и рамка со 20 куршуми, како и пет пакувања со 2.382 грама хероин.

Во попладневните часови на 23 септември, 23-годишна скопјанка во Полициската станица Центар пријавила обид за силување.

Според пријавеното, во близина на фонтаната во Градскиот парк машко лице се обидело да изврши обљуба врз неа.

Полицијата презема мерки за расчистување на настанот.