Дваесет и двегодишен тетовец доби кривична пријава бидејќи истепал сопственик на угостителски објект во градот.

Како што информираат од полицијата, настанот се случил пред да стапи на сила забраната за гости во локалите.

„Пријавениот дошол во објектот и побарал да биде послужен со пијалак, но откако бил одбиен со образложение дека сите маси се зафатени поради почитување на протоколите за работа и спроведување на мерките за заштита од ширењето на Ковид-19, тој го нападнал сопственикот“, соопшти полицијата.

Денеска, околу 12 часот, во тетовско Копанце, полициски службеници на СВР Тетово го привеле лицето Б. З. (33) од ова село, осуден на четиригодишна затворска казна за сторено кривично дело неовластено изработување, држење, посредување и тргување со оружје и распрскувачки материи, казниво според Кривичниот законик.

По приведувањето, реализирано со судска наредба, лицето Б. З. денеска ќе биде спроведено во затворот „Идризово“ во Скопје за издржување на казната, информираат од Министерството за внатрешни работи.

Основното јавно обвинителство во Велес донесе наредба за спроведување истражна постапка против едно лице од Велес на возраст од 31 година кај кого бил најден кокаин што го криел во патика.

„Осомничениот, на 13 април, неовластено, заради продажба, држел наркотична дрога кокаин во количина од 7,45 грама спакувана во едно полиетиленско пакување. Дрогата ја купил во Скопје од засега непознато лице, па со автомобил се упатил кон Велес. Пакетчето со дрога го држел скриено во левата патика, но му било пронајдено и одземено од полициски службеници на наплатната станица кај Сопот“, соопшти Обвинителството.

Имајќи предвид дека постои опасност од повторување на кривичното дело и опасност од бегство, со оглед на тоа што осомничениот подолг период престојува во Република Германија и имал намера повторно да замине таму, јавниот обвинител до судот достави предлог за определување притвор. Предлогот беше прифатен од страна на судијата на претходна постапка на Основниот суд Велес и определен е притвор во траење од 30 дена.​