Четириесет и четиригодишна скопјанка е приведена поради запуштање и малтретирање својата 16-годишна ќерка.

Девојката била подолго време заклучувана во домот и не добивала соодветна нега од родителот, велат од полицијата.

„На малолетничката веднаш ѝ е пружена соодветна помош и е сместена во здравствена установа, каде што е згрижена, а по службена должност ќе ѝ биде определен старател“, соопшти МВР.

Мајката била приведена, а потоа пренесена во психијатриска установа „Бардовци“, каде е задржана до понатамошна постапка. Против неа ќе биде поднесена кривична пријава, а се преземаат и дополнителни мерки и активности.

Полицијата приведе две малолетни лица од Скопје, поради тоа што извршиле тешка кражба во продажен објект во трговски центар.

Од МВР информираат дека украдените предмети се одземени и вратени на сопственикот.

По целосно документирање на случајот, против нив ќе биде поднесена пријава за тешка кражба.

Две лица на возраст од 18 и 26 години се здобија со тешки телесни повреди во сообраќајна несреќа што се случи утрово околу 4.30 часот на булеварот Гоце Делчев во Прилеп.

Од полицијата информираат дека во несреќата учествувале патничко возило „мерцедес“, управувано од А.М.(24) од Прилеп и возило „опел зафира“, управувано од А.Т.(45) од Прилеп.

„Во незгодата со тешки телесни повреди се здобиле Ф.В.(26) и Д.А.(18), двајцата од Прилеп, сопатници во возилото „мерцедес“, додека со телесни повреди се здобил возачот на истото возило, констатирани во Општата болница во Прилеп“, информираат од полицијата.

Увид на местото извршила екипа од Полициската станица Прилеп.