Триесет и девегодишен возач од кумановското село Орашац ноќеска е приведен откако при сообраќајна контрола утврдено е дека возел со 2,29 промили алкохол во крвта.

Покрај него,откриени се уште четворица возачи од Куманово, Демир Хисар и Кочани кои возеле под дејство на алкохол.

По целосно документирање на случаите против нив ќе биде поднесена пријава за „безобѕирно управување со моторно возило“.

Двајца мажи од село Лажани, општина Долнени, се приведени поради пукање со огнено оружје во колона возила за семејна веселба. Инцидентот се случил на 2 јануари околу 9:30 часот, кога полицајци од Полициското одделение Ропотово ги запреле М.С. (36) и С.Б. (29), кои возеле „фиат хрома“ со прилепски регистарски ознаки и „мерцедес“ со германски ознаки.

Од возилата, според полицијата, биле испукани повеќе куршуми. При контрола, кај М.С. бил пронајден гасен пиштол „Рити Игл“ со 40 куршуми калибар 9мм, додека кај С.Б. бил одземен пиштол „Валтер“ со 12 куршуми, исто така калибар 9мм.

За случајот е известен јавен обвинител, а по целосно документирање против двајцата ќе биде поднесена соодветна пријава.

Жител на кавадаречкото село Марена се здобил со тешка телесна повреда во фабрика во Кавадарци.

Како што информираа денеска од Секторот за внатрешни работи – Велес, вчера во 11 часот во ОВР – Кавадарци било пријавено дека во кавадаречката Општа болница со тешка телесна повреда бил донесен З.А., на возраст од 59 години.

– Според пријавеното, тој се здобил со повредата при извршување работни задачи во фабрика во Кавадарци. За настанот известен бил трудов инспектор, појаснија од СВР – Велес.