Просветниот инспектор Ѓорѓи Илиевски поднесе прекршочна пријава во тетовскиот Основен суд за Државниот универзитет во Тетово и за ректорот Вулнет Амети.

Илиевски при инспекцискиот надзор на Правниот факултет при ДУТ утврдил дека тројца државни функционери – министерот за образование и наука, Арбер Адеми, заменик-министерот за внатрешни работи, Агим Нихиу, и директорот на Државниот завод за индустриска сопственост, Сафет Емрули, незаконски биле унапредени.

Тој извршил и контролен надзор, а денеска закажал т.н. порамнување, но бидејќи тетовскиот универзитет не постапил во согласност со неговите барања да им бидат поништени звањата на функционерите, тој поднесе прекршочни пријави.

Државниот просветен инспекторат му предложи на директорот Томе Спировски дисциплинска мерка за инспекторот Илиевски зашто ја информирал јавноста за случајот, а постапката не била завршена. Тој, пак, смета дека тоа била негова обврска и дека му влијаеле и му се заканувале ништо да не говори во јавноста.

Eвроамбасадорот Самуел Жбогар при денешната посета на Општина Новаци изрази надеж дека парламентот ќе го донесе законот за Обвинителството со консензус.

Според него, случајот „Рекет“ покажуава дека Јавното обвинителство се бори против корупцијата и не гледа причина за политичка криза.

„Имате институции што функционираат. Јавното обвинителство функционира и специјалното обвинителство функционира и ќе функционира до 15 септември. Специјалната јавна обвинителка Јанева си поднесе оставка и тоа го имаме предвид. Сега политичките лидери имаат одговорност да најдат решение за идното функционирање на СЈО, а една од можностите е да биде интегрирано во рамките на Јавното обвинителство. Има доволно време да се најде решение. Веруваме дека парламентот ќе го донесе законот со консензус“, рече Жбогар.

Новиот предлог-закон за Јавното обвинителство, кој минатата недела го презентира премиерот Зоран Заев, утре влегува во собраниска процедура. За носење на законот потребно е двотретинско мнозинство. Според текстот на законскиот предлог, специјалното јавно обвинителство ќе се интегрира во Јавното обвинителство за организиран криминал.

Обвинителството за организиран криминал и корупција го доби извештајот од вештачењето на мобилниот телефон на обвинителката Катица Јанева, но во интерес на истрагата не соопшти повеќе детали за јавноста.

Од Обвинителството денеска потврдија дека не е пронајден вториот телефон на Јанева, а немаат ниту сознанија каде се наоѓа јавната обвинителка.

Телефонот на Јанева беше одземен во понеделникот и предаден на вештачење за евентуална поврзаност на специјалната обвинителка во случајот „Рекет“.

Јанева претходно поднесе оставка од функцијата и оттогаш не е достапна за јавноста.

По барање на Обвинителството, вчера беше запленет глисер во сопственост на второосомничениот во „Рекет“, Зоран Милевски – Кичеец, кој заедно со Боки 13 беше приведен минатата недела.