Основното јавно обвинителство Охрид, до надлежниот суд во Охрид, достави предлог за издавање казнен налог против едно лице за сторено кривично дело непостапување според здравствените прописи за време на епидемија, предвидено и казниво во чл. 206 ст. 1 од Кривичен законик.

Обвинетата на 18 март допатувала од Швајцарија – земја со високо ниво на ризик. Иако на граничниот премин Меѓународен аеродром „Скопје“ потпишала изјава, постапила спротивно на наредбата на министерот за здравство и одлуката на Владата на Република Северна Македонија за мерки за спречување внесување и ширење на коронаворусот Ковид-19. Наместо да спроведе задолжителна самоизолација во времетраење од 14 дена на адресата дадена во изјавата, излегла од своето престојувалиште и се упатила во непознат правец. На 20 март при контрола извршена од страна на полициски службеници обвинетата не била пронајдена во престојувалиштето, со што го сторила кривичното дело што и се става на товар.

Обвинителството му предложи на судот на обвинетата да ѝ биде изречена кривична санкција, парична казна во висина од 100 дневни глоби во вредност од 20 евра за една дневна глоба, односно вкупно 2.000 евра, и да ја задолжи со трошоците за постапката.​

Основните јавни обвинителства во Скопје и Велес доставија предлог за издавање казни против двајца скопјани и четворица велешани поради непочитување здравствени прописи за време на епидемијата.

Првиот обвинет скопјанец на 18 март на граничниот премин Деве Баир, враќајќи се од Бугарија, потпишал изјава дека ќе се самоизолира во траење од 14 дена во својот дом во Крушопек. Но, не постапил според прописите и наредбите на Владата, со кои се определуваат мерки за сузбивање или спречување на заразната болест Ковид-19. На 19 март, при полициска контрола, 42-годишниот обвинет не бил затекнат во својот дом.

Вториот обвинет скопјанец, пак, на 24 март во 23.50 часот не ја почитувал одлуката за забрана и посебен режим на движење на територијата на Република Северна Македонија, донесена со цел да се спречи ширењето на коронавирусот, па со патничко моторно возило„ фолксваген голф“ се движел по локалниот пат од Кондово кон Сарај. При обид да биде контролиран од страна на полициски службеници обвинетиот 29-годишник не застанал и продолжил да се движи.

Надлежниот јавен обвинител на Основниот кривичен суд Скопје му предложи на двајцата обвинети да им изрече парични казни од по 100 дневни глоби, при што висината на една дневна глоба да биде определена на 20 евра во денарска противвредност.

Обвинетите, двајца жители на Велес и двајца жители на Градско, не ја почитувале одлуката за забрана и посебен режим на движење на територијата на Република Северна Македонија донесена со цел да се спречи ширењето на коронавирусот.

Надлежниот јавен обвинител на Основниот суд Велес му предложи на обвинетите да им изрече парични казни во висина од по 40 дневни глоби, при што висината на една дневна глоба да биде определена на 20 евра во денарска противвредност.​​

Радовишанец на возраст од 24 години, по кој била распишана потерница поради бегство од срумичкиот затвор, бил пронајден и уапсен во текот на вчерашниот ден.

Како што информираат од МВР, на 29 март во 16.30 часот полицајци од Полициската станица Радовиш го уапсиле 24-годишниот Ф. Ј..

Во вечерните часови уапсениот бил предаден во струмичкиот затвор за издржување на казната.