Вчера во 20 часот во СВР Тетово биле приведени Е.И.(26), А.Д.(27), двајцата од Скопје и Р.И.О.(30) од Република Бугарија, кои околу 12:25 часот биле лишени од слобода во Скопје поради сомнение за сторено кривично дело неовластено производство и пуштање во промет на наркотични дроги, психотропни супстанции и прекурсори.

Тројцата се сомничат за инволвираност во случајот со пронајдените две вреќи со марихуана на локалниот пат над тетовското село Камeњане на 4.5.2021.

Тие се задржани во полициската станица Тетово и денеска со соодветен поднесок ќе бидат изведени пред судија во претходна постапка на Основниот суд Тетово.

Во нива во охридското село Лескоец вчера била пронајдена граната.

Од извршениот увид констатирано е дека се работи за неексплодирана артилериска граната калибар 55 милиметри, која потекнува од периодот на Првата светска војна. Гранатата била безбедно подигната од стручно лице од Центарот за управување со кризи.

Полицијата од Охрид информира дека е пронајден малолетникот кој вчера се изгуби околу 17:50 часот.

Од СВР Охрид информираат дека полициски службеници околу 19:15 часот во близина на паркинг-просторот кај плажата „Горица 3“ во Охрид го пронашле четиригодишното дете.

Претходно од родителите било пријавено дека детето се загубило кај скејт паркот на пешачката патека по каналот „Студенчишта“.