Топ
Татко си го тепал двегодишниот син до онесвестување

Татко си го тепал двегодишниот син до онесвестување по што ги заклучил другите деца во соба, а ја претепал и сопругата кога сакала да им помогне. Детето е задржано во болница на лекување, а татко му е приведен во полиција.
Нов случај на семејно насилство во Скопје открива полицијата во утринскиот билтен. Станува збор за 47-годишен Скопјанец Ф.С. против кој е поднесена кривична пријава од страна на Секторот за внатрешни работи Скопје до Основното јавно обвинителство во Скопје. Според полицијата, тој извршил две кривични дела – телесни повреди во вршење семејно насилство, казниво по член 130, став 2 од Кривичниот законик на Република Македонија.
Скопјанецот на 8 јули годинава во семејниот дом, во алкохолизирана состојба, физички ги нападнал својот двегодишен син и сопругата Ѓ.С. и им нанел телесни повреди. Додека сопругата била на работа, таткото физички го нападнал двегодишното дете по што тоа се онесвестило.
Како што информира полицијата, околу 18.30 часот мајката дошла од работа и ги затекла своите четири малолетни деца заклучени во соба. Во моментот кога нејзиниот најстар син (9 години) ја отворил вратата, скопјанецот физички ја нападнал сопругата. Таа успеала да избега во собата кај децата, кои кажале дека татко им ги тепал сите, а најмногу најмалиот брат.
Набргу мајката со такси-возило го однела двегодишниот син во Ургентниот центар при комплексот клиники „Мајка Тереза“, каде што му биле констатирани телесни повреди и бил задржан на лекување.
Во разговор со полициските службеници Ѓ.С. изјавила дека ова не е прв случај на семејно насилство од страна на Ф.С.. Тој и порано ги малтретирал. Со помош на Центарот за социјални работи на град Скопје другите три деца биле згрижени во шелтер-центар.
На 9 јули во 1.05 часот пријавениот Ф.С. бил приведен и задржан во полициска станица.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Почувствуван земјотрес во Македонија

Телеметриската сеизмолошка мрежа на Република Северна Македонија, на сеизмолошките станици инсталирани ширум нашата територија, одржувани од Сеизмолошката опсерваторија при Природно-математичкиот факултет во Скопје, попладнево во 16 часот и 14 минути регистрираше земјотрес чиј епицентар потекнува од епицентралното подрачје Тетово-Гостивар, 39 км западно од Скопје, со Рихтерова локална магнитуда, ML2.7.
Според досегашните податоци со кои располага опсерваторијата, земјотресот е почувствуван во Тетово, Гостивар и блиската околина со интензитет од III степени според Европската макросеизмичка скала.
Македонија
Мицкоски со остра осуда за скандирањата на ксенофобични пораки и национализам на натпреварот Македонија-Романија во Куманово

Премиерот, Христијан Мицкоски денес одговарајќи на новинарско прашање остро го осуди скандирањето на натпреварот Македонија-Романија во Куманово од страна на неколкумина присутни во салата, и посочи дека навивачките групи треба да ги бодрат своите тимови, без навредливи и ксенофобични пораки.
„Во текот на вчерашниот ден домаќинот а тоа беше кошаркарската федерација исто така и Општина Куманово го осудија скандирањето и ксенофобичните испади на неколкумина во салата, искрен да бидам додека бев таму, воопшто и не го забележав тоа, бидејќи стануваше збор за мала група на луѓе. Но, исто така еве би сакал да ја искористам оваа прилика да се приклучам кон осудата на национализмот и ксенофобијата, најпрвин на таа што се случи за време на кошаркарскиот натпревар помеѓу Македонија и Романија, а потоа и да упатам порака до сите навивачки групи да навиваат спортски, да го бодрат својот тим и националниот тим на Македонија. Тоа е она кое што оваа Влада го подржува, а сето останато ќе биде предмет на истрага и предмет на санкции, без разлика од која страна доаѓа“, вели Мицкоски.
„Уште еднаш да повторам апсолутно го осудувам ксенофобичното и националистичко скандирање на неколкумина кои што не наидоа на поддршка од страна на ниту еден од присутните во салата“, порача премиерот Мицкоски.
Македонија
Објавен огласот за финансиска поддршка за сметките за струја за ранливи потрошувачи

Министерството за енергетика, рударство и минерални суровини го објави јавниот оглас за финансиска поддршка за потрошена електрична енергија за ранливи потрошувачи во 2025 година.
Право на поддршка имаат домаќинства со едно или повеќе лица со тешка или длабока интелектуална попреченост, со најтешка телесна попреченост, потполно слепо лице и глуво лице, корисници на посебен надоместок заради попреченост со навршени 26 години возраст, а без оглед на старосната возраст, согласно член 44 од Законот за социјалната заштита, чиј вкупен нето доход кој подлежи на оданочување на месечно ниво согласно Законот за данокот на личен доход на членовите на домаќинството во 2024 година не го надминувал износот од:
· 24.500,00 денари за едночлено домаќинство,
· 42.000, 00 денари за домаќинство со два члена,
· 60.000, 00 денари за домаќинство со три члена и
· 80.000,00 денари за домаќинство со четири и повеќе члена, не сметајќи го посебниот надоместок согласно Законот за социјалната заштита.
При пресметка на вкупниот доход на домаќинството кој подлежи на оданочување на месечно ниво согласно со законот за данок на личен доход, надоместокот заради попреченост, не се засметува при пресметката на вкупниот нето доход на домаќинството. За ранлив потрошувач од точка 1 од овој јавен оглас не се смета лице кое што го користи правото на цивилна или воена инвалиднина.
Лицата со категориите од точка 1 од овој оглас се стекнуваат со финансиска поддршка преку намалување на месечната сметка за потрошена електрична енергија во износ од 1000,00 денари месечно, сметано од денот на поднесување на барањето, во времетраење од 12 месеци.
Вкупно ќе се распределат:
· 2. 300. 000,00 денари од вкупните средствата ќе бидат наменети за домаќинства во кое живее лице/лица со тешка или длабока интелектуална попреченост,
· 19. 000. 000,00 денари од вкупните средствата ќе бидат наменети за домаќинства во кое живее лице/лица со најтешка телесна попреченост,
· 9.000.000,00 денари од вкупните средства ќе бидат наменети за домаќинства во кое живее потполно слепо лице и
· 12. 000. 000,00 денари од вкупните средствата ќе бидат наменети за домаќинства во кое живее потполно глуво лице.
Не следува поддршка за лица со цивилна или воена инвалиднина или сместени подолго од 30 дена во институции.
Рокот за аплицирање по јавниот оглас изнесува 30 дена од денот на објавување на јавниот оглас.
Барањето се поднесува со пополнет образец кој е достапен во архивата на Министерството или на www.energy.gov.mk, каде се наведени и сите останати документи кои се задолжителни да се достават со барањето.
За тоа кои документи се задолжителни за секоја група на баратели погледнете на https://portal.mdt.gov.mk/post-body-files/izvestuvanja-file-3m6z.pdf
Документите се достапни во архивата на Министерството или може да се обезбедат преку интернет страната на министерството: www.energy.gov.mk .
Комисиите составени од по три члена ќе ги разгледуваат барањата, ќе вршат проверка преку надлежните институции и ќе предложат решенија до министерот. Поддршката започнува од месецот по објавата на списокот на корисници и се пресметува на месечната сметка за струја.
Неплатени две последователни сметки доведуваат до укинување на решението за поддршка.