Министерството за внатрешни работи во текот на вчерашниот ден (20.10.2021) продолжи со контролите во областа на сообраќајот.
На територијата на Град Скопје изречени се вкупно 94 мерки, меѓу кои за возење повеќе од дозволената брзина 15 санкции, 13 за возење без возачка дозвола, седум санкции за нерегистрирани возила, три за возење под дејство на алкохол, 25 мерки за непрописно паркирани возила.

МВР апелира до граѓаните да ги почитуваат сообраќајните правила и прописи за да ја зголемат безбедноста во сообраќајот и заедно да придонесат за посигурни патишта.

Во заедничка полициска акција на полициски службеници од Одделот за криминалистичка полиција – Сектор за недозволена трговија со дрога, оружје и опасни материи, Специјална антитерористичка единица „Тигар“ и ОВР Прилеп пресечен е меѓународен канал за транспорт на наркотична дрога марихуана, од Албанија преку нашата држава со крајна дестинација за Грција, а во вредност од околу 200.000 евра.

„ На патниот правец Прилеп-Битола од страна на сообрaќајна полиција запрено е патничко возило ‘пежо карван’, со скопски регистарски ознаки, управувано од М.Ј.(31) од Скопје и при извршена контрола било констатирано дека лицето не поседува возачка дозвола и возилото не било технички испрвно, а по извршениот преглед биле пронајдени две патни торби во кои имало 9 големи пакувања марихуана, во вкупна количина од 50 килограми“, соопшти МВР.

М.Ј. е приведен, за настанот известен е Јавен обвинител од ОЈО Прилеп и се преземаат мерки за утврдување на евентуална инволвираност и на други лица при транспортот на дрогата, по што од страна на ОВР Прилеп  ќе биде поднесена соодветна кривична пријава до надлежното ОЈО Прилеп по член 215 од Кривичниот законик.

Основното јавно обвинителство Гостивар до надлежниот суд поднесе предлог за издавање казнен налог против едно лице за кривично дело симнување или оштетување службен печат или знак од член 389 став 1 од Кривичниот законик.

Обвинетиот на 19 јули симнал службен печат од овластено службено лице – извршител за осигурување моторно возило „мерцедес“, попишано поради неплатен долг кон една банка. Печатот бил ставен на возилото по поднесено барање за извршување и пресуда од 2009 година од Основниот суд Гостивар. Јавниот обвинител предложи на обвинетиот за стореното да му биде изречена условна осуда со утврдена казна затвор од три месеци.