Професорот Сашко Јовев кој е променет од директорската позиција во Кардиохирургија, посочува дека министерот за здравство Фатмир Миџити го променил поради некаква протоколарна грешка за настан кој го организирала Клиниката. Тој кажа дека не излегол само тој жртва, туку и Кардиохирургијата. Според Јовев, Меџити се налутил оти доцна бил поканет.

„Во 35 години немав еден ден боледување земено. Минатата недела имав такви притисоци, што морав да се тргнам малку и да земам боледување кое денеска го прекинав поради ова. Имав притисоци дека сум направил грешка, дека грешката е во самиот протокол, при еден прекрасен настан во саботата, кога отворивме нова хибридна сала, единствена во регионот. Кога пуштивме во употреба апаратот кој одржува во живот човек без срце и бели дробови цели три месеци. Тогаш се случи, уредно да бидат поканети сите, министерот за здравство не дојде оти смета дека касно му била дадена поканата, дека нешто порано ја добил премиерот. Јас тука не можев да се мешам, па се најдов во средината и за на крајот да излезам жртва. Не излегов јас само жртва, излезе жртва Кардихирургијата.

За поддршката пред Клиниката, кажа дека се организирале 1.300 пациенти да дојдат.

„Ова е само дел од поддршката, бидејќи не сакавме да ја правиме пооглема и да прерасне во нешто друго и да се исполитизира ова. Ова е мојот тим кој чуда прави и кој работи 24/7, а не спие на чело со мене. Овде се некои од пациентите на кои се направени големи операции и многу други се јавија – пациенти, колеги, пензионирани доктори, пензионери. Околу 1.300 сакаа да дојдат, им рековме да не доаѓаат. Конечно мора да победи правдината. Не сакаме да се работи по политика туку по професионалност. За она што го работиме 24/7 и за она што се жртвуваме“, рече Јовев.

Пациенти дојдоа пред Кардиохирургија каде изразуваат поддршка на професорот доктор Сашко Јовев, разрешен од министерот за здравство Фатмир Меџити. Тие посочија дека срамота е да биде разрешан Јовев оти е професионалец. Тие посочија дека од него зависат животите на граѓаните.

„Дојдовме да дадеме поддршка на Јовев, кој се бореа да ни дадат нови животи. Револтирани сме од непрофесионалноста на министерот, каде сака да стави политички, а не стручни кадри. Од нив зависат нашите животи“, рече Јанкуловски Сашко, пациент.

На протестот излегоа и вработени од Клиниката.

„Дојдовме од проста причина, бидејќи не сакаме да го изгубиме стручњакот кој перфектно си ја врши својата работа. Срамота е ова што се прави. Јас сум оперирана пред седум месеци, сега се чувствувам преубаво. Не смееме да дозволиме ова да се случи, да биде шиканиран професорот“, рече Спасовска Љупка, пациентка.

Пациентите посочија дека благодарение на интервенциите од Јовев, тие сега се живи и здрави.

„Пред една година имав тешка операција на Кардиохирургија. Дојдов во последен момент како тежок случај. Благодарение на професорот и тимот, со силна и тешка операција, преживеав. Еве живеам и се надевам дека и натаму ќе живеам. Кога лежев на Интензивна нега, ќе се сеќавам на моментите кога секој ден по неколку пати професорот доаѓаше на интензивна нега, а нешто не беше во ред. Професорот прашуваше како сум, се бореше за пациентите, даваше насоки. Му давам голема поддршка не е во ред ова што се прави“, Љупчо Ангеловски, пациент.

Дел од нив, сметаат дека ваквото постапување е бркање од дома на прфесорот.

„Потресена сум и ме погоди ова. Оперирана сум од срце. Ме прими од ходник. Не може некој да го избрка од дома, он е овде дома. Нема правда овдека, срамота е ова. По толку трансплатации, дежурства… Кога и да отворам очи луѓето работеа овдека. Срамота е ова, срамота е човек да го избркате од дома“, рече Тина Алексовска, пациентка.

Јовев вчера беше разрешен од директорската позиција.

Смената на директорот на Клиниката за кардиологија, Сашко Јовев, кој ги предводеше трансплантациите на срце во земјат,а не е политичка, вели министерот за здравство, Фатмир Меџити. Тој, денес, по посетата на реновираните простории на Клиниката за ендокринологија, не сакаше да зборува за причините поради кои го разреши Јовев и најави дека попладнево на брифинг ќе ги изнесе сите детали.

„Политика, апсолутно, не стои зад смената на Јовев, секаде каде што ќе има злоупотреби со мене како министер, ќе има и санкционирање“, рече министерот Меџити и нагласи дека заедно со Јовев на успешните трансплантаци работел цел тим.

Меџити вчера го разреши Јовев од функцијата директор, а смената наиде на лавина неодобрување кај јавноста, особено кај пациентите со трансплантантирано срце и нивните семејства.