Вчера околу 00:40 часот, во полицијата во Скопје било пријавено дека на крстосницата меѓу булевар „Трета македонска бригада“ и улица „Пролет“ се случила сообраќајна несреќа во која тешко е повредена 18-годишна девојка од Турција.

Според пријавеното, патничко возило „киа“ со скопски регистарски таблички, управувано од 23-годишниот С.И.Х. од Турција, изгубило контрола и удрило во рекламен билборд.

Сопатничката Ј.А.Е. (18) се здобила со тешки телесни повреди и била пренесена во Комплексот клиники „Мајка Тереза“, каде што повредите ѝ биле констатирани.

Полицијата извршила увид на местото на несреќата.

ОВР Струга поднесе кривична пријава против Е.Б.(69) од Струга.

Тој се сомничи за сторено кривично дело по член 396 од Кривичниот законик  „Неовластено изработување, држење, посредување и тргување со оружје или распрскувачки материи“.

При претрес во неговиот дом, извршен по судска наредба, полициските службеници од ОВР Струга, пронајдоа и одзедоа еден пиштол калибар 7,65 милиметри и 16 куршуми различен калибар кои, нелегално ги поседувал.

Вчера во 23:35 часот на улицата „Вардарски рид“ во Гевгелија, полициски службеници од Полициската станица за граничен премин и граничен надзор Богородица го лишија од слобода 24-годишниот В.Ц. од Република Албанија.

При контрола на патничко возило „киа“ со албански национални ознаки, кое го управувал, пронајдени се 10 лица мигранти, од кои седум од Египет и три од Мароко.

Мигрантите се сместени во прифатно-транзитен центар во Гевгелија, а лицето е задржано во полициска станица.

Известен е јавен обвинител и по целосно расчистување и документирање на случајот, против него ќе биде поднесена соодветна пријава.