Денеска во претседателскиот кабинет во „Вила Водно“ претседателот Стево Пендаровски на церемонија со највисоки државни и воени почести го пречека словенечкиот претседател, Борут Пахор, со што започна неговата официјална дводневна посета на Северна Македонија.

Во рамки на посетата, покрај тет-а-тет средбата меѓу двајцата претседатели, се одржа и пленарен состанок на македонската и словенечката официјална делегација, како и заедничка прес-конференција.

На неа Пендаровски посочи дека посетата е значајна од повеќе аспекти, особено зошто словенечкиот претседател е прв државник кој ја посетува земјава во време на пандемија, со што, како што оцени македонскиот претседател, се докажува стратешкото пријателство и традиционалната блискост меѓу двете држави.

„Словенија е наша сојузничка во НАТО, а помошта во спроведувањето на реформите во одбраната, како и соработката меѓу нашите две армии беше и е од исклучително значење. Во делот на економијата, Словенија е наш значаен трговски партнер и инвеститор со години. И покрај намалената трговска размена оваа година поради здравствената криза, трговијата се одликува со стабилен раст. Наша задача е да го зголемиме нашиот извоз во Словенија и да го надоместиме трговскиот дефицит“, нагласи Пендаровски.

Тој рече и дека земјава добива словенечка поддршка во справувањето со коронавирусот, а напомена дека подолг временски период словенечките полицајци работат заедно со нашите полициски службеници на јужната граница, во справување со повеќегодишната мигрантска и бегалска криза.

„Имаме позитивно минато како дел од поранешната држава, споделуваме заедничка сегашност како сојузници во НАТО, а јас сум длабоко уверен дека ќе имаме и заедничка иднина како дел од Европската Унија. Словенија безрезервно ја поддржа одлуката на Европскиот совет во март оваа година за почеток на преговорите за нашето членство во ЕУ, а сега нè поддржува во намерата да ја одржиме првата меѓувладина конференција до крајот на годинава“, посочи македонскиот претседател.

Рече и дека билатералните релации ги збогатуваат и нашите научници и уметници кои ги изучуваат и предаваат јазиците и остваруваат интензивна културна размена, а ги спомена и граѓаните кои тука и таму го градат своето образование, својата кариера, создаваат семејства и на тој начин формираат нераскинливи врски меѓу двете општества и култури.

На крајот, Пендаровски изрази надеж дека успешната соработка меѓу двете држави ќе продолжи, а македонско-словенечкото пријателство ќе станува се поцврсто.

Откако при направениот увид и констатиран прекршок водостопанскиот инспектор на Државниот инспекторат за животна средина предложи постапка за посредување согласно законот, правниот субјект Рудник САСА и Државниот инспекторат за животна средина склучија спогодба за плаќање глоба со задолжување за спроведување на девет мерки, во посредство на Комисијата за спогодување на Министерството за животна средина и просторно планирање, соопшти Министерството за животна средина и просторно планирање.

За сторениот прекршок истекување на јаловишен материјал од Рудникот САСА во Каменичка Река, што се случи на 14 овој месец, согласно ова спогодба Рудникот САСА е задолжен да ги исчисти деловите од речното корито на река Каменица од јаловишен материјал и истиот да го однесе на депонијата за јаловиште со која располага рудникот, врз основа на претходно обезбедена согласност, дозвола од МЖСПП.

Треба да се изврши интервентно чистење на талогот на јаловината од бунарската зона на Каменица со цел да се спречи понатамошно загадување на подземните води со кои се снабдуваат бунарите за водоснабдување на дел од населението од општина Македонска Каменица, а потоа да се продолжи со чистење на речното корито на реката и да се исчисти зафатот од талогот на мала хидроелектрана која е под јаловиште бр. 4 со цел ставање во функција на зафатот на вода за производство на електрична енергија.

Исто така, требад да го стабилизира објектот јаловишна брана бр.4 и однесениот материјал јаловишен песок да го замени со соодветен материјал со исти или повисоки јакосни карактеристики. Санацијата на јаловишната брана да биде според техничко решение изработено од Рудник САСА на основа на документација обезбедена согласно закон.

„Треба да се отстрани геосинтетичката облога во делот на конктактите каде потпира хидројаловипшната брана бр.4 за да не дојде до недозволена контактна филтарација,да се предвидат дополнителни мерки за оперирање со хидројаловиштето, пред сè зголемување на должината на плажата од јаловишна кал со кое ќе се минимизира можноста од повторна контактна филтрација, да се предвиди времено решение доколку има испуштање на заматена вода низ преливен колектор поради сигурност на браната при што заматената вода да биде задржана во постоен резервоар и со пумпна станица да биде вратена во технолошкиот процес и да се постапи согласно член 198 од Законот за води т.е. според препораките од Годишниот извештај за анализа и стабилност на брани изработен со елаборат за анализа и стабилност на брана за 2019 г, кој треба да биде одобрен согласно член 195 од Законот за води“, се вели во соопштението.

Покрај тоа за правното лице Рудник САСА е изречена глоба во висина од 50 000 евра, а за одговорното лице глоба во висина од 15 000 евра во денарска противвредност.

Резултатите од една нова студија покажуваат дека Ковид-19 создал нова мутација која се чини дека е уште позаразна, а експертите велат дека тоа може да биде одговор на вирусот за да ги заобиколи маските и другите мерки за социјално дистанцирање.

Научниците идентификуваа нова варијанта на вирусот, идентификувана кај 99,9 отсто од случаите за време на вториот бран во областа на Хјустон, Тексас, пренесува „Вашингтон пост“.

Весникот наведува дека кај луѓето со мутацијата D614G на Ковид-19 имаат поголеми количини на вирусот, сугерирајќи дека таа е позаразна. Иако вирусот не е посмртоносен, истражувачите велат дека се чини оти е подобро адаптиран да се шири меѓу луѓето.

Дејвид Моренс, виролог од Националниот институт за алергија и заразни болести, вели дека наодите сугерираат оти вирусот може да стане позаразен и дека ова може да има последици врз нашата способност да го контролираме.

Тој рече дека е можно вирусот да еволуирал за да се спротивстави на мерките како миењето раце и социјалното дистанцирање.

„Носење маски, миење на рацете, сите тие работи се бариери за преносливост или зараза, но бидејќи вирусот станува сè позаразен, статистички е подобар во надминување на тие бариери“, посочи Моренс.