Жена од Тетово украла од својот сопруг 400.000 швајцарски франци, против неа е поднесена кривична пријава.

Според информациите на МВР, полицијата до Основното јавно обвинителство Тетово поднесе кривична пријава против А. Х. (65) од Мала Речица и нејзиниот брат С. С. (56) од Босна и Херцеговина поради постоење основи на сомнение за сторено кривично дело тешка кражба.

„Двајцата се сомничат дека во периодот од 4 до 8 јуни годинава, А. Х. му помагала на својот брат С. С. да украде 400.000 швајцарски франци од А. Џ. (80) од Мала Речица, кој е нејзин сопруг, и да избега во Босна и Херцеговина. По пријава на случајот во полиција, А. Х. исто така заминала во Босна и Херцеговина и од својот брат ја одзела комплетната сума по што заминала во Швајцарија“, се наведува во полицискиот билтен.

Двајца малолетници со убодни рани од нож вчера биле примени во поранешната градска болница во Скопје.

Според информациите на МВР, околу 21.25 часот во полиција од хируршката болница „Св. Наум Охридски“ било пријавено дека кај нив со повреди од остар предмет биле донесени две лица на возраст од 17 години.

Во разговор со полициски службеници тие изјавиле дека пред маркет на подрачјето на Чаир биле нападнати од три лица.

СВР Скопје презема мерки за расчистување на случајот.

Четириесет и шестгодишен ресенец загина во сообраќајна несреќа кога со автомобил излетал од патот.

Според информациите на МВР, несреќата се случила вчера попладне на регионалниот пат Ресен – с. Царев Двор, после клучката за с. Горно Дупени, кога возило „опел фронтера“, со ресенски регистарски ознаки, управувано од Е. С. (46) од Ресен, излетало од коловозот.

Возачот починал на местото на несреќата. Извршен бил увид од јавен обвинител и увидна екипа од Полициската станица Ресен.