Скопскиот аеродром се соочи со значителни проблеми во авионскиот сообраќај во последните 24 часа, а причина за тоа е густа магла која предизвика пренасочување на 10 летови и откажување на 4. Летовите беа пренасочени на соседни аеродроми во Приштина и Софија, додека некои се вратија на почетните дестинации.

Пренасочени летови:

Анталија (25.01.2025) – Пренасочен кон Приштина

Меминген (25.01.2025) – Пренасочен кон Приштина

Варшава (25.01.2025) – Вратен назад во Варшава

Баден Баден (25.01.2025) – Пренасочен кон Софија

Париз (25.01.2025) – Пренасочен кон Софија

Цирих (25.01.2025) – Пренасочен кон Приштина

Рим (25.01.2025) – Пренасочен кон Приштина

Малме (25.01.2025) – Пренасочен кон Приштина

Берлин (26.01.2025) – Пренасочен кон Софија

Нирнберг (26.01.2025) – Пренасочен кон Приштина

Откажани летови:

Истанбул (25.01.2025) – Откажан

Загреб (25.01.2025) – Откажан

Венеција (26.01.2025) – Откажан

Истанбул (26.01.2025) – Откажан

Препораки за патниците: Патниците се советуваат да ги следат официјалните канали на Скопскиот аеродром и да останат во контакт со авиокомпаниите за најновите информации.

Основното јавно обвинителство Скопје поведе постапка против 21-годишник за кого постои основано сомнение дека сторил други полови дејствија кон 19-годишна девојка, односно кривично дело од член 186 став 7 во врска со став 1 од Кривичниот законик.

Како што соопшти ЈОРМ, на 14 јануари девојката влегла во трговски центар и додека плаќала на една од касите ја забележал осомничениот кој пазарел во истата продавница. Ја следел извесно време додека девојката влегла во зграда во близина на трговскиот центар. Во влезот ја нападнал и започнал да ја допира. Жртвата се спротивставила и почнала да вика, по што осомничениот ја ослободил и избегал. Полицијата го пронашла и го лишила од слобода неколку дена подоцна.

Јавниот обвинител до судијата на претходна постапка од Основниот кривичен суд Скопје достави предлог за определување мерки на претпазливост – одземање на патна и друга исправа за преминување на државната граница, обврска осомничениот да се јавува кај определено службено лице во судот и забрана да се приближува или да воспоставува контакти со жртвата.

Судот донесе решение со кое ги определи мерките за обезбедување.

Директорот на Фондот за здравствено осигурување (ФЗОМ), Сашо Клековски, вечерва изјави дека нема да поднесе оставка на барањето на СДСМ, посочувајќи дека партијата нема кредибилитет за таков повик.

Според Клековски, лидерот на СДСМ, Венко Филипче, не понел одговорност за трагичниот инцидент со изгорените пациенти во тетовската болница, што ја прави партијата некомпетентна да бара одговорност.

„СДСМ, чиј лидер Филипче не понесе одговорност за живо изгорени пациенти, сега бара одговорност. Јас сметам дека тие немаат никаков кредибилитет за тоа“, рече Клековски.

Тој истакна дека во периодот на власт на СДСМ, се случила сериозна злоупотреба на скапите лекови на Клиниката за онкологија, што оставило сериозни последици кои се чувствуваат и денес.

„Нема да поднесам оставка, бидејќи ниту со чинење или нечинење не сум придонел ништо во оваа ситуација. Напротив, и јас, и Фондот, и Клиниката, раководството и персоналот, напорно работиме на надминување на наследената ситуација. Да потсетам дека ова раководство е на функцијата само шест месеци, по седум години девастација“, додаде Клековски.

Во однос на ситуацијата во Клиниката за онкологија, каде што се појави недостиг на биолошка терапија, Клековски објасни дека од вкупно 5.000 пациенти, само мала група се со недостиг на специфична терапија, и дека се работи на отстранување на овој проблем.

„Ја наследив Клиниката со 12 милиони евра долг и сите оние проблеми кои допрва ќе излегуваат во јавноста. Во овие шест месеци Фондот обезбеди дополнителни пет милиони евра за санација на финансиската состојба“, рече Клековски.

Тој истакна дека важен приоритет е детално планирање на набавката на лекови, а ќе се користат и директни спогодби со производителите, а не со веледрогериите. Според него, без расчистување на минатото, ќе биде тешко да се подобри состојбата во здравствениот сектор. Клековски апелираше Јавниот обвинител да се произнесе за работењето на Клиниката за онкологија во изминатите седум години.