Црна хроника
(Видео) МВР со детали за претресите во Скопје, Ресен, Битола и во Кочани: приведени 18 лица, поднесени кривични
![](https://makfax.com.mk/wp-content/uploads/2023/07/2-4.jpg)
Денеска, од страна на Секторот за внатрешни работи Скопје во содејство со Одделот за криминалистичка полиција и Одделот за специјални полициски операции, во координација со надлежен јавен обвинител од Основното јавно обвинителство Скопје, беше спроведена координирана полициска акција насочена кон лица инволвирани во шверцување луксузни моторни возила на подрачјето на СВР Скопје, како и на подрачјата на Битола, Кочани и Ресен. Притоа извршени се претреси на 24 локации кај вкупно 23 лица со цел пронаоѓање и обезбедување дополнителни материјални докази, кои потекнуваат од извршени кривични дела, од слобода се лишени вкупно 18 лица, а по 3 лица се трага.
Од страна на СВР Скопје во текот на денешниот ден ќе биде поднесена кривична пријава до ОЈО Скопје за сторени кривични дела шверцување по чл. 278, „Прикривање стоки што се предмет на шверцување и царинска измама“ по чл. 278-б, фалсификување исправа по чл. 378, спречување докажување по чл. 368, злоупотреба на лични податоци од чл. 149, фалсификување службена исправа од чл. 361 и компјутерски фалсификат од чл. 379-а од Кривичниот законик, против 21 лице на возраст од 20 до 49 години, од кои 5 се вработени како референти во Одделението за управни работи – Скопје, и тоа: Д. С. (43), Н. Н. (42), В. И. (48), С. С. (37), А. Л. Т. (29), А. П. (20), З. А. (38), С. А. (49), Н. К. (26), П. М. (41), А. Ј. (38), М. И. (45), Ф. Ф. (31), З. Т. (25), С. К. (39), С. К. (41), И. Ј. (30), М. А. К. (43), Д. Т. (34), М. С. (35), И. В. (46), како и против едно правно лице од Кочани.
Од страна на СВР Скопје при преземањето на мерките и активностите во рамките на спроведено криминалистичко истражување утврдено е дека во период од 2020 до 2022 година пријавените извршувале криминални активности, односно шверцување луксузни моторни возила, така што им ги менувале оригиналните идентификациски броеви на шасијата, потоа изготвувале или обезбедувале фалсификувана документација и ги внесувале преку државната граница со оригинални или со фалсификувани странски регистарски ознаки или со претходно издадени македонски регистерски ознаки. Тие, избегнувајќи ја царинската контрола, ги пренесувале како непријавена стока, без да ги пријават во транзитна постапка за да се почне со царинска постапка. Притоа, искористувајќи фалсификувани документи, како и претходно издадени оригинални македонски регистарски ознаки, кои потоа со употреба на лажни јавни исправи како вистинити, односно со фалсификуван идентификациски број, ги легализирале возилата како оригинални, со цел нивна понатамошна препродажба преку фиктивни продажби како хаварисани и нивни продажби за нереални износи, со цел стекнување противправна имотна корист од приближно 36.329.247 денари, односно над половина милион евра.
Во рамките на истражувањето одземени се 14 патнички возила, кои се предмет на потрага во Србија, БиХ, Белгија, Луксембург, Данска, Германија, Шведска, Велика Британија и во Бугарија, како и џип „ланд ровер“ и 1 мотоцикл.
Инаку, утрово, со судска наредба и во координација со јавен обвинител од ОЈО Скопје, извршени се претреси на дом и други простории во 23 објекти на подрачјето на Скопје, како и во Кочани, Битола, Ресен, при што се пронајдени и одземени еден воздушен хеклер, марихуана, еден пиштол, прашеста материја, над 400 куршуми во калибар од 9 мм, 12 куршуми во калибар од 7,64 мм, куршум во калибар од 7,65 мм, куршуми – 7.62 мм, куршуми – 7.62 x39, 40 куршуми за гасен пиштол, две воздушни пушки, детектор за метал, четири рамки со 25 куршуми, еден топовски удар, една рачно направена бомба, еден панцир со плоча, бејзбол-палки, ножеви, стари полициски амблеми, радиоврски, дрон, сензор за аларм, придушувачи, компјутери и поголем износ на пари во разни валути, осум договори за купопродажба, печати од правно лице и други предмети, како што соопшти Сузана Прањиќ-Талевска од МВР.
Приведените лицата во текот на денот ќе бидат изведени пред судија на претходна постапка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Црна хроника
Нормализиран сообраќајот на патот Битола-Прилеп по сообраќајната несреќа
![](https://makfax.com.mk/wp-content/uploads/2022/12/soobrakjajka.jpg)
Од 19:35 часот сообраќајот на магистралниот пат Битола-Прилеп е нормализиран по сообраќајната несреќа, информира АМСМ.
Несреќата беше пријавена во 15 часот и 48 минути во близина на ѓубриштето, а сообраќајот се пренасочуваше по стариот пат.
Засега нема информации за состојбата на учесниците во несреќата.
Црна хроника
Масовна тепачка пред маркет во Брвеница, шестмина уапсени
![](https://makfax.com.mk/wp-content/uploads/2022/08/tepacka.jpg)
Вчера во 18.45 часот во Тетово, на патот за тетовска Брвеница, полициски службеници од СВР Тетово ги лишиле од слобода С.А.(49) и С.Л.(19) од тетовска Мала Речица, Г.Ц.(52) од Тетово и М.А.(28) и Ф.М.(44), двајцата од Република Косово, а во 19.40 часот во Клиничка болница Тетово и С.Р.(29) од Мала Речица, кои околу 18.30 часот пред маркет на улица „Брвенечка кривина“, по вербална расправија, започнале физичка пресметка во која користеле и тврди предмети, извести МВР.
„Според пријавеното, во текот на пресметката било оштетено и патничко возило „БМВ“ со косовски национални ознаки, управувано од 44-годишната Ф.М.“, соопшти МВР.
Тие се задржани во полициска станица за понатамошна постапка и против сите инволвирани лица ќе следува соодветен поднесок.
Црна хроника
Се преврте кајак во Охридското езеро, двајца малолетници спасени со полициски чамец
![](https://makfax.com.mk/wp-content/uploads/2023/08/ohridsko-ezero-meteo.jpg)
Денеска во 09.30 часот во Полициската станица за граничен надзор „Охридско Езеро“ пријавено е дека во водите на Охридското Езеро, на плажата „Бафало бич“, се превртел кајак, сопственост на кајак клуб од Охрид во кој имало две малолетни лица, извести СВР Охрид.
По добиената пријава, полициски службеници од Езерската полиција со пловен објект се упатија на посоченото место и во водите на езерото, на околу 100 метри од плажата, забележани се двете малолетни лица кои на себе имаа појаси за спасување. Тие со полицискиот чамец се префрлени во полициската станица, каде им е укажана прва помош, соопшти СВР Охрид.