Две лица од Скопје се приведени и против нив е поднесена кривична пријава по брза постапка за сторено кривично дело учество во толпа што ќе изврши кривично дело, казниво според Кривичниот законик, соопшти полицијата.

Имено, од страна на Единицата за насилен криминал – Одделение за насилен криминал при СВР Скопје, по преземени мерки и активности, лишени се од слобода Д. Ј. (32) и С. Ј. (18) од Скопје и во соработка со ОЈО Скопје против нив е поднесена кривична пријава по брза постапка за сторено кривично дело учество во толпа што ќе изврши кривично дело според член 385 од Кривичниот законик.

Тие се сомничат дека на 5.7.2022, околу 21 часот, за време на одржување ненајавен јавен сoбир организиран преку социјалните мрежи, почнале да фрлаат со камења и разни други предмети кон полициските службеници и зградата на Собранието. Против нив се обезбедени сите докази по што се изнесени пред судија на претходна постапка.

СВР Скопје продолжува со преземање мерки и активности за идентификување сторители на кривични дела за време на протестите и обезбедување докази против нив по што заедно со кривичните пријави, ќе бидат приведени и изнесени пред надлежен јавен обвинител и пред судија на претходна постапка, информираат од МВР.