Вчера во 16:50 часот на патарина „Петровец“ во Скопје, полициски службеници го лишија од слобода М.А.(28) од Босна и Херцеговина поради постоење основи на сомнение за сторено кривично дело по член 268 од Кривичниот законик.

Имено, тој на патарината поминал со товарно возило со босански национални ознаки и притоа платил со банкнота од 10 евра за која вработениот се посомневал дека е фалсификувана.

Банкнотата е одземена за понатамошна постапка. Тој е задржан во полициска станица и по целосно документирање на случајот ќе следува соодветна пријава.

Полициските службеници од СВР Охрид во текот на 14 и 15 октомври привеле неколку лица поради нарушување на јавниот ред и мир и агресивно однесување.

На булеварот „Македонски просветители“ е приведен 53-годишен охриѓанец кој се однесувал агресивно и лажно пријавил дека бил физички нападнат. Кај него биле измерени 1,51 промили алкохол.

На улица „Партизанска“ полицијата привела 42-годишен маж кој прво правел неред во продавница, а потоа физички се спротивставил на обезбедувањето. Алкотестот покажал 3,52 промили.

Во селото Лескоец се приведени двајца лица, на возраст од 34 и 46 години, поради меѓусебна физичка пресметка пред продавница. Кај нив биле утврдени 2,30 и 2,46 промили алкохол.

Против сите лица ќе бидат поднесени соодветни пријави по целосно документирање на случаите.

Вчера во 17:40 часот на ул.„Живко Брајковски” во Гостивар, полициски службеници од Полициското одделение за безбедност на патниот сообраќај Гостивар го лишија од слобода С.Т.(69) од Гостивар.

Според информациите на МВР, претходно, тој учествувал во сообраќајна незгода со неговото патничко моторно возило „нисан” со гостиварски регистарски таблички и при преземање мерки во врска со незгодата констатирано е дека е под дејство на алкохол, односно измерени му се 1,94 промили алкохол во крвта.

Тој е задржан во полициска станица и по документирање на случајот, против него биде поднесена пријава за „безобѕирно управување со моторно возило“.