Пратениците од партиите на власт не го поддржаа законот за ограничување на патните трошоци што го предложи партијата Левица.

Пратеникот и портпарол на Левица, Амар Мециновиќ, смета дека со тоа ќе продолжи праксата на злоупотреба и наплаќање на енормни суми.

„Јавноста веќе долго го артикулира овој проблем и директно влијае врз достоинството на Собранието, пратениците и политичкиот систем. Како анти-естаблишмент партија, ние пробуваме да го вратиме она што народот некогаш го имаше – политичка моќ. Овие кои денес ја владеат државата ВМРО-ДПМНЕ, токму нивниот министер или фридманист – Трајко Славески ги укина патните трошоци за работниците“, истакна Амар Мециновиќ.

Предлогот на партијата е патните трошоци да се пресметуваат: 6,5 литри на секои изминати 100 километри, бидејќи сегашната одредба погрешно се толкува, и пратениците испумпуваат пари за армотизација и патарини.

Пратениците од ЗНАМ ниту досега наплаќале, ниту ќе наплаќаат патни трошоци. Само еден колега од пратеничката група за седум месеци има добиено 30.000 денари по сите основи гориво, патарини и амортизација што претставува помалку од направените реални трошоци од и до Собранието, изјави на прес-конференција пратеничката од ЗНАМ, Даниела Белимова.

Партијата не го поддржа предлогот на политичката партија Левица, трошиците да се пресметуваат спрема пазарната цена на 6,5 литри на секои изминати 100 километри, што би претставувало драстично намалување.

„Нашиот став за овој предлог закон на Левица останува принципиелен. Ќе ги игнорираме сите предлози чија единствена цел е популизам и креирање театар на секоја тема. Подготвени сме за конструктивен процес на разговори за сите прашања, со сите пратенички групи за да се дојде до заедничко решение. Само низ дијалог може да се работи за доброто на граѓаните“, рече Белимова.

Како што додаде, ЗНАМ не се изјаснува за нешто што веќе го практикува, а ниту еден предлог кој доаѓа од партијата Левица нема да биде разгледуван и коментиран.

„Ниту овој закон, ниту друг предлог што ќе дојде од Левица нема да го разгледува и коментира од единствена причина дека нивната цел е сопствена промоција, а не нудење на решенија“, беше посочено.

Предлогот на партијата Левица не ја доби поддршката од владејачкото мнозинство на денешната седница. По тој повод, Димитар Апасиев по гласањето порача: „Честито нови милиони евра, колеги патриоти, со здравје да си ги трошите“.

Тања Чачарова-Илиевска, членка на Судскиот совет, денес не беше спремна да зборува за поднесената интерпелација за петтемина членови на Судскиот совет. Најави дека ќе го каже ставот откога добро ќе ги анализира наводите во интерпелацијата.

„Ја прочитав, но поради обврски, денес немав можности добро да ја разгледам. Она што ми падна во очи е дека тоа не е интерпелација за членот Тања Чачарова-Илиевска на Судскиот совет, туку упатува за интерпелација на Судскиот совет. Се зборува за колективна одговорност. Јас не еднаш во моите обраќања, и на седници и во јавност кога сум зборувала, кажувам дека одговорноста мора да биде индивидуална и покрај тоа што Судскиот совет е колективно тело. Ние сите гласаме со својот глас за една одлука и во зависност од гласот на секој од нас се носи одлуката со мнозинството гласови. Токму од тие причини сметам дека навистина добро треба да ја анализирам и ќе дадам одговор во рокот предвиден во Деловникот за работа на Собранието“, рече Чачарова-Илиевска.

Откога ќе ја направи анализата на интерпелацијата, Чачарова-Илиевска најави дека ќе има и став за евентуална оставка. Премиерот Христијан Мицкоски очекува членовите на Судскиот совет да бидат доблесни и да си поднесат оставки доколку Собранието изгласа интерпелација.

Претседателот на Собранието, Африм Гаши, официјално ги извести членовите на Судскиот совет, Весна Дамева, Тања Чачарова-Илиевска, Милазим Мустафа, Павлина Црвенковска и Селим Адеми, дека е побарана интерпелација за нив. Петтемина за членови на Судскиот совет беа избрани во Собранието.

Во образложението на интерпелациите стои дека се поднесени поради негрижа, нарушување на угледот на судиите и загрозување на довербата на граѓаните во судството.

Барањето за интерпелација на членовите на Судскиот совет во Собранието на почетокот на месецот го поднесоа пратеници на ВМРО-ДПМНЕ, „Влен“ и ЗНАМ.