Американскиот претставник Стив Виткоф изјави во интервју за „Си-ен-ен“ дека рускиот претседател Владимир Путин за прв пат се согласил да вклучи клаузула за колективна одбрана во потенцијален мировен договор за Украина.

Зборувајќи во емисијата „Состојбата на Унијата“, Виткоф појасни дека договорот е замислен како заобиколување на црвената линија на Русија – членството на Украина во НАТО. Наместо формално да се приклучат на Алијансата, САД и европските земји ќе понудат безбедносни гаранции со формулацијата „слична на Член 5“, која ги обврзува сите членки на меѓусебна одбрана.

„Се согласивме дека Соединетите Американски Држави и другите европски земји би можеле да понудат формулација слична на Член 5 како дел од безбедносната гаранција“, рече Виткоф. Тој додаде дека Путин јасно ставил до знаење дека членството на Украина во НАТО е неприфатливо, но дека тие ги започнале преговорите од претпоставката дека Украинците можат да се согласат на алтернатива.

„Сè зависи од тоа со што можат да живеат Украинците. Но, почнувајќи од тоа, успеавме да ја добиеме оваа отстапка – дека САД можат да понудат заштита слична на Член 5“, рече тој.

Виткоф нагласи дека ова е „прв пат да слушнеме дека Русите се согласиле“ на таква клаузула во кој било мировен договор.

Досега, ниту рускиот претседател ниту други функционери јавно не коментирале за толкувањето на преговорите од страна на администрацијата на Трамп.

Украинскиот претседател Володимир Зеленски изјави дека не гледа индикации дека Русија е подготвена за трилатерален самит меѓу него, американскиот претседател Доналд Трамп и неговиот руски колега Владимир Путин.

„Во оваа фаза, нема индикации од Русија дека трилатералниот самит ќе се одржи“, рече тој за време на кратката заедничка прес-конференција со претседателката на Европската комисија Урсула фон дер Лајен.

Претседателката на Европската комисија изјави дека се надева на трилатерален самит „што е можно поскоро“.

Преговарачка позиција на Украина

Украинскиот претседател изјави дека сегашните фронтовски линии во војната на неговата земја против Русија треба да бидат основа за мировни преговори.

„Ни требаат вистински преговори, што значи дека можеме да започнеме таму каде што е сега линијата на фронтот“, рече Зеленски, додавајќи дека европските лидери го поддржуваат тоа.

Зеленски го повтори својот став дека е потребно да се воспостави примирје за потоа да се преговара за конечен договор.

Дипломатска офанзива со европските сојузници

„Важно е Вашингтон да биде со нас“, рече украинскиот лидер. На разговорите со Трамп во понеделник, тој ќе биде придружуван од неколку европски сојузници.

Украинскиот претседател отпатува во Брисел за да учествува на видеоконференција на „коалицијата на добронамерните“, која ги собира поддржувачите на Киев, вклучувајќи го францускиот претседател Емануел Макрон, британскиот премиер Кир Стармер и германскиот канцелар Фридрих Мерц. Потоа тој ќе отпатува за Вашингтон заедно со европските лидери за да се сретне со Доналд Трамп во Белата куќа.

„Не знам точно за што разговарале Путин и претседателот Трамп“ за време на нивниот самит во Алјаска, рече Зеленски. „И би сакал претседателот Трамп да сподели многу детали со мене и со европските лидери“, додава тој.

Безбедносни гаранции и руски барања

Она што „претседателот Трамп ни го кажа за безбедносните гаранции за мене е многу поважно од мислите на Путин. Бидејќи Путин нема да ни даде никакви безбедносни гаранции“.

Украинскиот лидер, исто така, рече дека Путин, има „многу барања“ за прекин на конфликтот во Украина, но дека „не ги знае сите“.

„Ако навистина има толку многу колку што слушнавме, тогаш ќе биде потребно време да се разгледаат сите“, рече тој.

Зборувајќи заедно со Володимир Зеленски, шефот на Европската комисија го поздрави предлогот на американскиот претседател Доналд Трамп да ѝ се понудат на Украина безбедносни гаранции слични на оние на НАТО.

Скопското Обвинителство донесе наредба за спроведување истражна постапка против 28-годишна жена осомничена за обид за убиство. Пред два дена, во домот на улицата Борис Бојаџиски во скопската населба Ѓорче Петров, таа се обидела да ја убие бабата на својот сопруг со која живееле во семејна заедница.

Додека бабата, родена 1938 година, одмарала во една од собите, осомничената ја заклучила вратата, седнала врз неа и со перница врз главата се обидела да ја задуши. Таа исто така ја удирала со тупаници по главата.

Според информациите од Обвинителството, престанала кога мислела дека ја убила и за тоа му кажала на сопругот. Тој веднаш повикал полиција.

Бабата била пренесена во болница, каде и биле констатирани нагмечување на главата и вилицата, како и хематоми.

До судот доставен е предлог за определување мерка притвор.