Црна хроника
Затвор за дивите копачи и продавачи на културното наследство во предметот „Ниџе“

Предметот во врска со културното наследство, познат во јавноста како „Ниџе“, за кој Основното јавно обвинителство за гонење организиран криминал и корупција кон крајот на септември минатата година отвори истрага против осум лица, денеска во Основниот кривичен суд заврши со пресуда.
Откога шестмина обвинети во фаза на оценка на обвинителен акт признаа вина и во мај годинава се спогодија со јавниот обвинител Маја Конеска, денес, на главната расправа во Основниот кривичен суд – Скопје, другите двајца обвинети признаа дека сториле кривично дело злосторничко здружување и кривично дело изнесување во странство добра под привремена заштита или културно наследство или природни реткости.
Воедно, обвинетиот Б. К. призна дека сторил и кривично дело прикривање, а обвинетиот Н. Л. и кривично дело оштетување или уништување добра под привремена заштита или културно наследство или природни реткости. За кривичните дела што им се ставаат на товар судот донесе пресуда, со која на обвинетиот Б. К. му изрече единствена казна затвор во траење од четири години, а на Н. Л. казна затвор во траење од една година и шест месеци.
Б. К. и Н. Л. како членови на група, заедно со организаторите и припадниците на групата што се сега осудени, вршеле кривични дела против културното наследство во периодот од мај 2020 година до крајот на септември 2021 година. Во рамките на криминалната група секој од припадниците на групата имал точно дефинирана улога според која дејствувал. Заедничката цел на групата била илегално истражување, копање археолошки локалитети на македонската територија, прикривање во сопствените домови, нудење продажба на заинтересирани купувачи и продавање добра – културно наследство во сопственост на Македонија.
Б. К. како припадник на групата, за да придонесе во заедничката цел на групата, во сопствениот дом прикривал археолошки предмети илегално ископани од археолошки локалитети и ги нудел на продажба на заинтересирани купувачи од странство. Обвинетиот Н. Л., пак, без дозвола од надлежен државен орган вршел истражување на археолошки локалитети и локалитети што содржат природни реткости, недозволено ископувал, присвојувал и нудел на продажба добра, споделувал информации и возвратно добивал координати од НН-припадници на групата од други земји.
За другите обвинети, во мај годинава судот донесе пресуди врз основа на предлог-спогодби, со кои обвинетите ги огласи за виновни и им изрече казни, и тоа:
– Д. Р. како организатор на криминалната група е осуден на единствена казна затвор во траење од пет години за сторени кривични дела злосторничко здружување, оштетување или уништување добра под привремена заштита или културно наследство или природни реткости, изнесување во странство добра под привремена заштита или културно наследство или природни реткости и прикривање;
– К. Т. како организатор на криминалната група е осуден на единствена казна затвор во траење од четири години за сторени кривични дела злосторничко здружување, оштетување или уништување добра под привремена заштита или културно наследство или природни реткости и изнесување во странство добра под привремена заштита или културно наследство или природни реткости;
– на З. Т., С. К., П. М. и на Ѓ. П. судот им определи алтернативни мерки условни осуди за сторени кривични дела злосторничко здружување и оштетување или уништување добра под привремена заштита или културно наследство или природни реткости, Ѓ. П., освен за погоре наведените кривични дела, е осуден и за прикривање. За З. Т. и С. К. е утврдена единствена казна затвор во траење од една година и два месеца, која нема да се изврши доколку обвинетите во рок од четири години не сторат ново кривично дело, а за П. М. и Ѓ. П. е утврдена единствена казна затвор во траење од една година и еден месец, која нема да се изврши доколку обвинетите во рок од четири години не сторат ново кривично дело.
Одземените предмети и добра, како и средствата со кои осудените ги извршиле кривичните дела, со одлука на судот се одземаат.
На денешното рочиште одбраната на обвинетите во завршните зборови истакна дека Обвинителството спроведе една исклучително комплексна постапка и откри околности што се особено актуелни и дека во овој предмет и пред донесување на одлуката на судот во голема мера, освен специјалната превенција, постигнати се и целите на генералната превенција бидејќи постапката извршила исклучително позитивно влијание кај пошироката општествена заедница во насока на спречување извршување кривични дела од ваков вид.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Црна хроника
Средовечен маж од Охрид ѝ испраќал експлицитни пораки и фотографии на тинејџерка

Полицијата во Охрид го уапси Т.Т.(51). Тој се сомничи дека од април оваа година во повеќе наврати на апликација на социјална мрежа на 17-годишно девојче од Охрид испраќал пораки и фотографии со недолична содржина и барал од неа и таа да му испраќа фотографии со експлицитна содржина.
Со судска наредба бил извршен и претрес во неговиот дом, при што биле пронајдени и одземени мобилен телефон и ловечка пушка „застава“ со калибар 12 мм.
Лицето било задржано во полициска станица и во координација со јавен обвинител против него ќе биде поднесена кривична пријава.
Црна хроника
Уапсени пет возачи за безобѕирно управување со моторно возило во текот на изминатото деноноќие

Вчера во 17:58 часот на автопатот Скопје-Тетово, на место викано „Студена вода“, полициски службеници од СВР Тетово го лишиле од слобода 31-годишниот А.Ј. од село Долна Лешница, општина Желино. При контрола со радар било констатирано дека управувал патничко возило „ауди“ со брзина од 184 километри на час на место каде максимално дозволена брзина е ограничена на 80 километри на час.
Вчера во 16:22 часот на автопатот Скопје-Тетово, кај Добарски надпатник, полициски службеници од СВР Тетово го лишиле од слобода Б.А.(25) од с.Студеничани, скопско. При радарска контрола било констатирано дека тој управувал патничко возило „бмв“ со скопски регистарски ознаки со брзина од 192 километри на час на место каде максимално дозволена брзина е ограничена на 100 километри на час.
Вчера во 15:45 часот на регионален пат во општина Маврово и Ростуше, на место викано „Ростушко Анче“, полициски службеници од ОВР Дебар го лишиле од слобода В.Д.(48) од Скопје. При контрола во патниот сообраќај, полициските службеници сопреле патничко возило „шкода“ со скопски регистарски ознаки, кое го управувал, и по преземени мерки било констатирано дека е под дејство на алкохол, односно му биле измерени 2,90 промили алкохол во крвта, по што веднаш бил исклучен од сообраќај.
Денеска во 01:50 часот во Велес, полициски службеници од СВР Велес го лишиле од слобода Д.В.(27) од Велес. При контрола во патниот сообраќај, полициските службеници сопреле патничко возило „бмв“ со велешки регистарски ознаки, кое го управувал, и по преземени мерки било констатирано дека е под дејство на алкохол, односно дека му биле измерени 2,28 промили алкохол во крвта, по што веднаш бил исклучен од сообраќај.
Вчера во 17:37 часот на патот Битола-Граничен премин Меџитлија, кај с.Кравари, битолско, полициски службеници од СВР Битола при контрола со радар во патниот сообраќај констатирале дека С.С.(22) од с.Средно Егри, битолско, управувал патничко возило „фоксваген поло” со битолски регистарски ознаки со брзина од 107 километри на час во населено место на место каде што максималната дозволена брзина е 50 километри на час. С.С. веднаш бил исклучен од сообраќај.
За настаните биле запознаени надлежни јавни обвинители и по нивно целосно документирање против лицата ќе бидат поднесени пријави по член 297-а од Кривичниот законик – „безобѕирно управување на моторно возило”.
Топ
Тешко повредена жена во Автокоманда, маж ја удрил во главата со гајба полна со стаклени шишиња

Основното јавно обвинителство Скопје поведе постапка против едно лице за кого постои основано сомнение дека сторил кривично дело – Тешка телесна повреда.
Делото го сторил вршејќи насилство врз жена со која имале претходни лични недоразбирања. На 23 август попладне оштетената отишла да се види со осомничениот пред угостителски објект во населбата Автокоманда. Тој најпрво започнал грубо да ја навредува, а потоа зел пластична гајба полна со стаклени шишиња, замавнал со неа и ја удрил по главата.
Жената започнала обилно да крвари и зашеметена успеала да повика полиција, по што со брза помош била пренесена во болница, каде и биле констатирани тешки телесни повреди.
Имајќи го предвид начинот на сторување на кривичното дело, а со цел да се заштити жртвата од можноста за ново загрозување на нејзината безбедност, здравје и живот, јавниот обвинител побара на осомничениот да му бидат определени повеќе мерки на претпазливост: забрана за приближување или воспоставување, односно одржување контакти или врски со оштетената, привремено одземање на патна исправа за преминување на државна граница и обврска да се јавува повремено на определено службено лице.