Во Скопје вечерва светна новогодишната елка и официјално беше отворен Божиќниот маркет, со што симболично беше означен почетокот на празничната магија во главниот град.

Градоначалникот на Град Скопје, Орце Ѓоргиевски, им се заблагодари на скопјани, особено на најмладите, за масовното присуство, радоста и позитивната енергија што, како што наведе, заеднички ја споделиле на настанот.

„По години сивило, Скопје повторно блесна“, порача Ѓоргиевски, додавајќи дека со оваа церемонија градот направил значаен чекор напред кон визијата да се развива рамо до рамо со современите европски градови, преку создавање настани што носат заедништво и радост за сите генерации.

Градоначалникот оцени дека оваа вечер ќе остане запишана и ќе прерасне во убава традиција, упатувајќи благодарност до сите граѓани што со своето присуство ја направиле ноќта посебна.

„Време е Скопје повторно да живее со светлина, насмевки и празнична топлина“, порача Ѓоргиевски.

Со свеченото украсување и отворањето на Божиќниот маркет, Скопје официјално влезе во празничниот период. Ѓоргиевски претходно денес најави повеќе настани во таа насока.

Во периодот од 15 до 31 декември секојдневно од 18 часот ќе има  празнична програма со музички настапи, диџеј сетови уметнички изведби и бројни изненадувања. Секој викенд од 12 до 14 часот содржините се целосно посветени на најмладите со анимации, креативни работилници, интерактивни активности и празнични изненадувања.

„Ова е почеток на нешто ново, магично и возбудливо за нашиот град. Првпат во историјата Скопје ќе ја дочека новата 2026 година со вистинска новогодишна зимска бајка. Настан кој ги обединува сите генерации од најмладите до највозрасните заедно се семејствата, пријателите, сограѓаните. Скопје конечно ќе покаже дека може да биде весел, модерен и динамичен град, град кој наликува на светска метропола во срцето на Балканот“, вели градоначалникот Ѓорѓиевски.

Централниот дел од новогодишната програма започнува на 27 период во кој градоначалникот Ѓорѓиевски смета дека Скопје ќе живее во полн празничен ритам. Напладне на Плоштад Македонија ќе дојде дедо Мраз со подароци и изненадувања за сите присутни.

Посебна можност во празничните денови Град Скопје ќе им даде на талентираните средношколци.

„Публиката ќе има можност да ги слушне најталентираните скопски средношколци кои ќе настапат со свои музички изведби и свои бендови. Во програмата се вклучени сите средни училишта на градот Скопје како дел од заложбата за поттикнување на младинската креативност и активно учество во културниот живот на нашиот град. Ги поканувам сите граѓани, сите семејства и посетители заедно да ја започнеме новата традиција и да бидат сите дел од новогодишната магија создавајќи Скопје исполнето со светлина, радост и позитивна енергија“, повика градоначалникот Ѓорѓиевски.

Тој кажа дека имал само една желба околу дочекот, забавата да ја направам домашни музички ѕвезди, па за дочекот се најавени Каролина Гочева, Тамара Тодевска, Миле Кузмановски, Огњан Здравковски, Куку Леле, Лара, Пајак, Два Бона и Тина Перовска.

Зимската бајка Град Скопје ја организира со финансиска поддршка од Државната лотарија на Македонија.

Украинскиот претседател Володимир Зеленски изјави дека позициите на САД и Украина за поделбата на териториите сè уште се разликуваат. Тој го објави ова за време на заедничката прес-конференција со Фридрих Мерц на Германско-украинскиот економски форум, пренесува „Европејскаја правда“.

Тој нагласи дека САД дејствуваат како посредник во овие преговори.

„Секако, не сите прашања се едноставни. Постојат сложени работи, особено во врска со териториите. Секако, сите го покренуваат ова прашање. И тука е важно сите ние да работиме на тоа ваквите прашања да се решат апсолутно праведно. Дијалогот за териториите не беше доволен и ми се чини дека досега имаме различни позиции, да бидам искрен, но мислам дека колегите го слушнаа мојот личен став“, рече Зеленски.

Во исто време, тој истакна дека е постигнат напредок по многу прашања за време на неодамнешните преговори.

„Навистина имаше напредок по многу прашања. Искрено, не знам како Русија ќе го перцепира ова – во однос на релевантните резултати од нашите разговори“, нагласи украинскиот шеф на државата.

Во Берлин се одржа состанок на украинската делегација предводена од Володимир Зеленски со претставници на тимот на американскиот претседател Доналд Трамп.

Специјалниот претставник на американскиот претседател Стив Виткоф денес објави значителен напредок во преговорите.

depositphotos

Ахмед ал Ахмед, случаен минувач кој вчера херојски совлада и разоружа еден од напаѓачите на плажата Бонди, порача дека и покрај тешките повреди и големите болки, повторно би го направил истото, пишува мелбурншкиот „Дејџ“. Неговиот адвокат за миграции, Сем Иса, го посетил вечерва и потврдил дека Ахмед не жали за својот чин.

„Не жали за она што го направи. Рече дека повторно би го сторил истото. Но болката почна да зема данок“, изјави Иса, додавајќи дека здравствената состојба на Ахмед се влошила. „Воопшто не му е добро. Прострелан е со повеќе куршуми. Нашиот херој моментално се мачи“, рече тој. Ахмед се опоравува во болницата „Сент Џорџ“ во Когарах, по првата операција, а постои стравување дека би можел да ја загуби левата рака.

Тој има пет прострелни рани на раката, а еден куршум, кој се заглавил во задниот дел на левата лопатка, сè уште не е изваден. „Многу е полошо отколку што се очекуваше. Кога ќе помислите на куршум во рака, не помислувате на сериозни повреди, но тој изгубил многу крв“, изјави Иса.

Откако во 2022 година добил австралиско државјанство, Ахмед се чувствува „должен“ на заедницата која го прифатила. „Ахмед е скромен човек, не го интересира медиумското внимание, тој само го направи она што чувствуваше дека мора да го направи како човечко суштество тој ден“, објасни неговиот адвокат.

„Ова е негов начин да ја изрази благодарноста за тоа што останал во Австралија, за доделеното државјанство. Навистина ја цени оваа заедница и чувствуваше дека, како нејзин член, мора да постапи така и да придонесе“, рече тој. Претходно денес, родителите на Ахмед, Фатех и Малака, изјавиле дека нивниот син е „во добро расположение“.

„Рече дека му благодари на Бога што можел да го направи тоа, да им помогне на невините луѓе и да ги спаси од овие чудовишта, овие убијци“, изјави неговиот татко. Мајката додаде дека не можела да престане да плаче од гордост кога слушнала дека нејзиниот син спасил животи.

Херојството на Ахмед го пофали и американскиот претседател Доналд Трамп.
„Во Австралија, како што веројатно прочитавте, имаше една многу, многу храбра личност која директно се соочи со еден од напаѓачите. Спаси многу животи, многу храбра личност која моментално е во болница, прилично сериозно повредена. Имам голема почит кон човекот што го направи тоа“, изјави Трамп.

Ахмед ал Ахмед (44), муслиман со потекло од Сирија, пристигнал во Австралија во 2006 година. Тој е сопственик на продавница за тутун и татко на две ќерки, на возраст од пет и шест години. Неговиот братучед Мустафа, кој од вчера е постојано со него во болница, вели дека Ахмед без сомнение е херој.

„Апсолутно, тој е херој. Би го дал животот за да спаси други луѓе“, рече Мустафа, додавајќи дека Ахмед му доверил дека не знае што го обзело, но дека Бог му дал „сила каква што никогаш претходно немал“.

Вчера Ахмед пиел кафе со својот братучед Џозај Алкани во Бонди, недалеку од местото каде што се одржувала прославата на Ханука. „Тоа беше само 10 минути пред да се случи ова“, раскажа Алкани. Кога започнала пукањето, Ахмед му рекол на братучедот: „Ќе умрам. Те молам, посети го моето семејство и кажи им дека заминав да спасувам животи.“

Снимките од местото на настанот покажуваат како Ахмед му приоѓа на напаѓачот, го совладува и му ја одзема пушката. Откако го потпрел оружјето на дрво, напаѓачот се повлекол и му се придружил на другиот напаѓач на блискиот надвозник. Ахмед тогаш, влегувајќи во линијата на оган за да ги заштити другите, бил погоден со два куршума.

Патот на Ахмед до австралиското државјанство бил тежок. По бегството од граѓанската војна во Сирија, неговото барање за државјанство било одбиено во 2019 година поради обвинувања за поседување украдена стока, кои подоцна биле отфрлени.

Државјанството конечно му било доделено во 2022 година. Судските записи покажуваат и дека во 2022 година признал вина за помали прекршоци поврзани со тутун, а во 2023 година бил прогласен за виновен за поседување нож, но без заведена осуда.

Неговиот адвокат Иса сега се залага постарите родители на Ахмед да добијат државјанство „како награда за службата на нивниот син кон заедницата“.
„Ова е можност за премиерот да направи нешто добро како награда за неговата храброст“, порача тој.

Како одговор на неговиот херојски чин, покрената е GoFundMe кампања, во која повеќе од 5.700 луѓе собрале над 570.000 долари за помош на Ахмед. Меѓу донаторите е и американскиот милијардер Бил Акман, кој донирал 100.000 долари.

Премиерот Ентони Албаниз и премиерот на Нов Јужен Велс, Крис Минс, ја пофалија храброста на Ахмед.

„Денес видовме Австралијци кои трчаа кон опасноста за да им помогнат на другите. Тие Австралијци се херои и нивната храброст спаси животи“, изјави Албаниз.

„Мислам дека вреди да се потсетиме дека во сето ова зло, во сета оваа тага, сè уште постојат прекрасни, храбри Австралијци кои се подготвени да ги ризикуваат своите животи за да му помогнат на целосен странец“, додаде Минс.