Според последните податоци на Центарот за управување со кризи, до утрово во земјата регистрирани се вкупно 33 пожари на отворен простор. Од нив, еден пожар е активен, четири се под контрола, а 28 пожари се целосно изгаснати.

Единствениот активен пожар е во општина Василево, во селото Нивичино, каде гори нискостеблеста шума.

Пожарите што се под контрола се на следните локации: општина Велес (околу селата Џидимирци, Крушје и Иванковци), општина Дојран (село Николич), општина Демир Хисар (депонија), како и општина Македонски Брод (помеѓу селата Црешнево, Локвица и Крапа).

Пожари што се изгаснати во текот на изминатите денови имало во различни региони на земјата, вклучувајќи го Гостивар, Кочани, Неготино, Старо Нагоричане, Куманово, Кратово, Сарај, Гази Баба, Сопиште, Студеничани, Карпош, Ѓорче Петров, Петровец, Босилово, Желино, Тетово, Јегунивце, Македонска Каменица, Струга и Илинден.

Граѓаните се повикуваат на внимателност и почитување на забраната за движење во шуми, да не пали оган на отворено и да не се фрлаат догорчиња.

Битолската полиција поднесе кривична пријава против 29-годишниот Г.П. од селото Ангелци, општина Василево, кој се сомничи за две кривични дела „убиство во обид“, три „тешки кражби“ и „недозволено изработување, држење и тргување со оружје“.

Според полицијата, во периодот од 2 до 7 јули годинава, Г.П. извршил низа кражби во викенд куќи во битолско – влегол во два објекти во село Крклино, при што не украл ништо, но направил материјална штета. Во село Долно Српци, насилно влегол во куќа и украл ловечка пушка и гориво.

На 7 јули, користејќи ја истата пушка, пукал кон три лица – 22-годишно момче и двајца малолетници на 15 и 16 години. Подоцна, при обид да побегне, во близина на селото Вашарејца се обидел да пука и кон полициски службеници, но не успеал. Полицијата возвратила и го погодила во ногата, по што бил приведен.

Против него е поведена постапка, а истрагата продолжува.

Јавниот обвинител Љупчо Коцевски заедно со неколкумина јавни обвинители вчера одржаа работен состанок со тим од Програмата за јакнење на демократијата во Западен Балкан и британската Амбасада во Скопје, предводени од Ник Хокинс, тим лидер и поранешен Крунски јавен обвинител на Обединетото Кралство и експертот Калум Кокс, долгогодишен адвокат, судија и јавен обвинител во Велика Британија.

На состанокот беа разгледани можностите за британска стручна поддршка и помош за македонските јавни обвинителства преку Програмата за јакнење на демократијата во Западен Балкан, која се спроведува во пет земји од Западен Балкан: Босна и Херцеговина, Црна Гора, Северна Македонија, Косово и Србија.

Програмата опфаќа 4 компоненти: зајакнување на судските институции, носење на независни обвинителски одлуки, подобрена транспарентност, јавен пристап и подобрена практика на изрекување казни како и подобрено управување и одговорност.

Јавниот обвинител Коцевски ги запозна британските експерти со состојбите во Јавното обвинителство, како и со нагласениот фокус на јакнење на истражните центри на обвинителството и на борбата против организираниот криминал и корупцијата.

На работниот состанок, шефот на Основното јавно обвинителство за гонење на организиран криминал и корупција Ислам Абази, првиот човек на најголемото основно јавно обвинителство во државата – ОЈО Скопје Гаврил Бубевски и претседателот на Здружението на јавните обвинители, јавниот обвинител во ЈОРСМ Елвин Вели подетално со британските експерти разговараа за сите клучни активности во кои би можела да биде искористена британската стручна помош.

Притоа, како основен чекор во рамките на проектот беше усогласено финализирање на Методологијата за проценка на сложеност на предметите. Исто така преку програмата ќе бидат опфатени и структурирани обуки за јавни обвинители за повеќе конкретни теми. Воедно, дел од програмата ќе опфати и директно менторство во сложени предмети со цел согледување на најдоброто искуство и практики од Велика Британија во водењето и ефикасноста на обвинителските постапки.