Прпиадници на полицијата, армијата, нуркачи, кајакари се во интензивна потрага по 16-годишното девојче од селото Уланици, Градско, кое вчера беше одвлечено додека се капело во водите на Вардар.

Девојчето влегло во водата заедно со 29-годишна девојка од истото село, којашто успеала да се спаси. На малолетното девојче му се изгубило секаква трага, а помош побарала неговата сестра. Денес и семејството на девојчето ја следеше потрагата, која засега е безуспешна, според информациите од терен за „Макфакс“.

Од полицијата велат дека случајот бил пријавен вчера околу 16.30 часот. Според пријавата, К.П.(29) од Скопје, со привремен престој во селото Уланци, општина Градско и 16-годишно девојче од истото село, се капеле во водите на реката Вардар во близина на Уланци. Малолетничката била одвлечена по течението на реката. К.П. неколку пати се обидела да ја извлече, но не успеала.

Скопското Обвинителство поведе постапка против 60-годишник осомничен за тешка кражба.

Кражбата ја извршил на Клиниката за радиотерапија и онкологија, каде искористил невнимание на еден пациент од велешко, ја протнал раката во неговиот џеб и одзел 300 евра и 28.000 денари.

Пациентот малку подоцна забележал дека му се украдени парите и пријавил во полиција, а сторителот бил идентификуван од снимките на видео камерите во болницата, соопшти Обвинителството.

Имајќи предвид дека сторителот бил и претходно осудуван, како и дрскоста со која делото сега го извршил во медицинска установа во која во исто време поголем број пациенти во тешка состојба, меѓу кои и оштетениот, чекале да примат терапија од која им зависи животот, јавниот обвинител на судијата на претходна постапка му предложи да определи мерка притвор за осомничениот. Притворот е прифатен.

Уште поробусна акција за подобрување на демографската слика на земјава најави премиерот Христијан Мицкоски за следната година во споредба се сегашното удвојување на бројот на бесплатни инвитро-оплодувања од три на шест. Одговарајќи на новинарски прашања по пуштањето во употреба на булевар во Неготино тој кажа дека се бадијала сите проекти доколку не се работи на демографијата.

„Главен предизвик за годините и децениите што следат пред нас е демографијата и демографската слика. Јас многупати за тоа сум зборувал и ќе продолжам да зборувам и ќе бидам многу гласен бидејќи бадијала ни се и овој асфалт и овие натпатници, потпатници, паркови и се што правиме ако немаме дечиња кои ќе ги користат, ако немаме потомство кое понатаму сето ова ќе го ужива и ќе додаде квалитет во нивниот живот. Ние можеме да реновираме безброј градинки и да направиме училишта во рамките на нашите можности, се разбира, но ако немаме дечиња кои ќе бидат таму тогаш сето тоа ни е залудно“, рече премиерот Мицкоски.

За него создавањето семејство и потомство, меѓудругото, е патриотски чин.

„Некои може ќе ме прогласат и за конзервативен некои може ќе ме прогласат за човек кој можеби живее во минатото, јас мислам дека демографијата, потомството, дечињата, создавањето семејство е патриотски чин. И денеска така се брани иднината на Македонија и на македонскиот народ и иднината на македонските граѓани. Ценам дека овие двојно зголемени бесплатни шест ин витро процедури, за разлика од минатото кога беа три, се во таа насока. Но не застануваме тука, продолжуваме и понатаму така што во годината која што следи ќе имаме, би рекол, многу поробусни акции кои ќе значат подобрување на демографската слика на Македонија“, најави премиерот Мицкоски.

Земјава последнава деценија бележи загуба на природниот прираст од над 8.000 лица годишно, односно имаме повеќе умирања отколку раѓања. За да се стимулираат раѓањата Владата предложи, а Собранието веќе го изгласа законот со кој бесплатните инвитро-оплодувања од досегашните три обиди се зголемија на шест обиди, а се скрати и процедурата за одобрување на поднесените барања од три месеци, колку што се чекаше досега, на две недели.