Центарот за граѓански комуникации го објави истражувањето за фирмите коишто се на списокот што го објави Министерството за транспорт и врски за одземање на нивните лиценци за градежно работење и урбанистичко планирање, а по спроведените контроли и трагичниот настан во Кочани.

Иако на списокот на фирми на коишто ќе им се одземат лиценци за градежно работење и урбанистичко планирање што го објави Министерството за транспорт и врски има 479 фирми, всушност лиценци ќе им се одземат на 426 фирми, бидејќи на списокот има некои фирми што се повторуваат, а други на коишто им се одземаат по неколку лиценци.

Истражувањето за фирмите на коишто ќе им се одземат лиценци за градежно работење и урбанистичко планирање што го објави Министерството за транспорт и врски, покажува дека на фирмите ќе им се одземаат 11 различни видови лиценци. Вкупно ќе бидат одземени 471 лиценца.

Истражувањето открива дека:

– Лиценци ќе им се одземат на 426 фирми, бидејќи од 479-те фирми на списокот има некои што се повторуваат, а други на коишто им се одземаат по неколку лиценци.

– На фирмите ќе им се одземаат 11 различни видови лиценци, а вкупно ќе бидат одземени 471 лиценца.

– За најголем дел од фирмите, лиценците што ќе им се одземат не се услов за фирмите да работат и да добиваат државни тендери.

– Во моментов, само 49 од фирмите што се на листата за одземање лиценци имаат актуелни договори за јавни набавки во вкупна вредност од 26 милиони евра.

– Сепак, само 23 фирми кои имаат важечки договор за јавна набавка всушност ќе ја загубат лиценцата којашто била услов за добивање на тендерот. Овие фирми имаат вкупно 58 договори за јавна набавка, чија вкупна вредност изнесува 14 милиони евра.

– Од сите фирми на списокот, 101 има добиено тендер во последните три години, во вкупна вредност од 77 милиони евра.

– 28 % од фирмите за одземање лиценца се со блокирана сметка или се правно или деловно неактивни, а останатите фирми се активни.

– Приходи оствариле 85 % од фирмите во вкупна годишна вредност од 128 милиони евра (за 2023 година која е последната година за којашто има објавено податоци).

– Најголем дел од фирмите остваруваат ниски годишни приходи. Секоја трета (31 %) од фирмите има годишен приход помал од 15 илјади евра, додека приходи поголеми од 1 милион евра имаат само 33 фирми, односно 8 %.

– Во сите овие фирми работат 2188 луѓе. 4 % од овие фирми немаат вработен, а 3 % имаат само еден вработен. Со повеќе од 10 вработени се само 3 % од фирмите.

Министерот за здравство и лидер на Алијанса за Албанците, Арбен Таравари, не сака да избрзува со носење какви било политички одлуки во овој момент. Таравари денес кажа дека имаат одлука само за советничките листи на претстојните локални избори и остануваат на ставот дека во трка за албанските гласови ќе одат сами, како Алијанса за Албанците, а не како дел од коалицијата „Вреди“ која, пак, ги донесе на власт. Напуштањето на коалицијата „Вреди“ за локалните избори Таравари не смета дека е причина за напуштање и на Владата, но доколку премиерот, како единствено лице што ја формира Владата одлучи дека Алијанса за Албанците не е потребна, нема да имаат проблем со тоа.

„Напуштањето на ‘Вреди’ не мора да значи и напуштање на Владата. Владата ја прави премиерот. Јас сум разговарал со премиерот, доколку тој смета дека Алијанса за Албанците не треба, ние немаме никаков проблем, меѓутоа мислам дека во овој момент Алијанса за Албанците треба. Доколку донесат таква одлука нема никаков проблем. Не може никој друг да каже освен тој што формира Влада. Со него ќе се видиме, се слушаме, во комуникација сме, така да ќе видиме во следните денови. Затоа ви велам во овој момент треба да бидеме што порационални, да не брзаме“, рече министерот Таравари денес при посетата на кумановската болница.

Тој смета дека реакциите за одвојувањето на Алијанса за Албанците од коалицијата „Вреди“ за локалните избори не се ништо друго освен емотивни.

„Ние како политичка партија одлучивме да излеземе со сопствени советнички листи исто како што одлучи и ЗНАМ да излезе со сопствени советнички листи меѓутоа во една меѓусебна политичка поддршка со ВМРО. Исто и ние понудивме на ‘Вреди’. Ние излегуваме со наши советнички листи, доколку сте подготвени тука сме и јас гледам емоционални реакции од тоа што остана во ‘Вреди’. Овој период ние треба да бидеме многу внимателни, многу умни и да се обидеме да бидеме што порационални бидејќи се работи за политика. Јас овој период не сакам да давам прогнози и гледам што поопрадвано да донесуваме одлуки. На крајот на краиштата доколку ‘Вреди’ се одлучни во тоа што го кажуваат овие четири – пет дена ние како политичка партија ќе ги видиме нашите опции за нашите кандидати кои ќе бидат за градоначалници“, вели министерот Таравари.

Министерот за животна средина, пак, и досегашен коалициски партнер на Таравари, Изет Меџити, цврство стои на ставот дека Алијанса за Албанците освен од „Вреди“, која веќе прераснува во една политичка партија, треба да излезе и од Владата оти не може и да остане дел од Владата и да преговара со ДУИ.

Регионалниот центар за управување со кризи (РЦУК) Битола, информира, дека преку 112 во ЦУК во 17.39 часот, била добиена пријава за починато лице за коешто јавувачот известил дека најверојатно е погодено од гром во село Мажучиште, Општина Прилеп.

За ова, од Секторот за операции и координација на ЦУК, веднаш биле известени во МВР и во Итната медицинска помош (ИМП) за понатамошна постапка.

Според последната информација добиена од РЦУК Битола истите известиле до ЦУК дека лицето од село Мажучиште, Општина Прилеп било погодено од гром по што е пренесено во Итна медицинска помош во Прилеп и била констатирана неговата смрт.