Цариниците на граничните премини Блато и Богородица заплениле поголема количина лекови за животни.

94 пакувања лекови и препарати за животни (течности за инекции penstrep, maxtil, limoxin, penbex и combikel, спрејови super spray, таблети exiptol и гелови aloegel), за кои е потребно одобрение за увоз издадена од Агенцијата за храна и ветеринарство, биле пронајдени позади седиштето на автомобил со албански регистарски таблички со кој албански државјанин се пријавил за влез во државата на граничниот премин Блато.

Исто така, поголема количина лекови за животни е запленета и на граничен премин Богородица, откако истата е откриена во контрола на автомобил со бугарски регистарски таблички.

Патниците кои се враќале од Солун биле прашани дали имаат нешто да пријават, но истите не пријавиле ништо по што поради сомневање е извршена контрола. При контролата на автомобилот пред совозачкото седиште во црна кеса и на задните седишта во стиропорна кутија покриено со јакна се пронајдени 23 парчиња Intergonan 5000 IU, 12 ќеси од по 20 парчиња Cidr ovis, 150 апчиња Ibendazile provet 600.

Непријавената стока подлежи на мерки на трговска политика и за истите е потребна дозвола од Агенција за храна и ветеринарство.

Царината заплени 133 шишенца со раствор за инјекции со вкупна вредност од 529.872 денари на граничниот премин Деве Баир. Лековите биле пронајдени кај косовски државјанин кој патувал со автобус.

„Мобилен тим на граничен премин Деве Баир при контрола на автобус заплени 133 шишенца со раствор за инјекции Gadovist 1.0 mmol/ml од 15 ml, со вкупна вредност од 529.872 денари, за кои е потребна дозвола за увоз издадена од Бирото за лекови. Непријавените лекови кои се користат за дијагностика на бенигни и малигни заболувања при магнетна резонанца се пронајдени во кеса сместена на патничко седиште и истите биле сопственост на косовски државјанин кој патувал со автобусот“, информираа од Царинската управа.

Од Секторот за контрола и истраги е поднесена кривична пријава против сторителот за сторено кривично дело криумчарење.

Царински службеници на влез во државата на граничен премин Блаце запленија 504 кутии со 126 килограми тутун за наргиле во вкупна вредност од 971.772 денари.

Од Царинската управа информираат дека тутунот за наргиле е откриен при контрола на автомобил со македонски регистарски таблички.

Патникот кој инсистирал побрзо да помине поради сомнително однесување е селектиран за детална контрола при што се пронајдени 504 кутии од 250 грама тутун за наргиле со вкупна тежина од 126 килограми. Со ова е спречен обид за пуштање во промет на акцизна стока за која е избегнато плаќање давачки во висина од 661.812 денари.

Случајот е предаден на Секторот за контрола и истраги за понатамошна постапка, при што против сторителот ќе биде поднесена кривична пријава за сторено кривично дело избегнување на плаќање акциза, казниво по Кривичниот законик.